দক্ষিণ চীন সাগৰত উত্তপ্ত হৈছে পৰিস্থিতি। মাৰ্কিন যুক্তৰাষ্ট্ৰ আৰু চীনৰ মাজত দক্ষিণ চীন সাগৰকলৈ সম্পৰ্কৰ অধিক অৱনতি ঘটিছে।
আন্তৰাষ্ট্ৰীয় সংবাদ মাধ্যমৰ সূত্ৰৰ খবৰ অনুসৰি দক্ষিণ চীন সাগৰৰ বিতৰ্কিত জলৰাশিত চীনৰ সৈন্যই যুদ্ধৰ অনুশীল আৰম্ভ কৰিছে।
ফলত চীনে এই সমগ্ৰ অঞ্চলৰ আকাশ মাৰ্গক ‘ন’ ফ্লাই জ’ন’ হিচাপে ঘোষণা কৰি বিমান উৰণত নিষেধাজ্ঞা জাৰি কৰিছে।
যোৱা মংগলবাৰে উক্ত নিষেধাজ্ঞা জাৰি কৰা আকাশ মাৰ্গত এখন মাৰ্কিন U-2 বিমানে তহলদাৰী কৰে।
২৪ ঘণ্টাৰ ভিতৰত চীনৰ গতিবিধি নিৰীক্ষণ কৰাৰ উদ্দেশ্যে উক্ত অঞ্চলৰ আকাশ মাৰ্গত পুনৰ এখন RC-135S মাৰ্কিন বিমানে তহলদাৰী কৰে।
ইয়াৰ পিছতে আমেৰিকাৰ ওচৰত চীনে কূটনৈতিক স্তৰত তীব্ৰ প্ৰতিবাদ সাৱ্যস্ত কৰাতে ক্ষান্ত নাথাকি চীনে আমেৰিকাক সতৰ্ক কৰিবলৈ দুটা অত্যাধুনিক তথা উচ্চ ক্ষমতাসম্পন্ন মিছাইল নিক্ষেপ কৰে।
জানিব পৰা মতে উক্ত নিক্ষেপ কৰা মিছাইল দুটাৰ এটা হৈছে DF-26 বালেষ্টিক মিছাইল, যিটো ৪ হাজাৰ কিলোমিটাৰ পৰ্যন্ত আঘাত সানিবলৈ সক্ষম। এই মিছাইলটোৱে স্থল আৰু জল পথেৰেও আণৱিক অস্ত্ৰ কঢ়য়াই নি শত্ৰপক্ষক আঘাত কৰিব পাৰে।
চীনে নিক্ষেপ কৰা আনটো মিছাইল হৈছে DF-21, যিটোৱে ১ হাজাৰ ৮ শ কিলোমিটাৰ পৰ্যন্ত আঘাত সানিব পাৰে। বিশেষতঃ চীনে যুদ্ধ বিমানৰ বিৰুদ্ধ ব্যৱহাৰ কৰিবলৈ নিৰ্মাণ কৰিছে এইটো মিছাইল।
উল্লেখ্য যে যোৱা মাহত দক্ষিণ চীন সাগৰত যুদ্ধবিমান পৰিবাহী USS Nimitz আৰু USS Ronald Reagan-ৰে মাৰ্কিন নৌসেনাই সামৰিক অনুশীলন আৰম্ভ কৰিছে।
চীনে উক্ত মাৰ্কিন যুদ্ধ জাহাজ দুখন মিছাইল নিক্ষেপেৰে ডুবাই দিয়াৰ ইঙ্গিত প্ৰদান কৰিবলৈকে এই দুই মিছাইল নিক্ষেপ কৰা বুলিও বিশ্লেষকসকলে ধাৰণা কৰিছে।
স্মৰ্তব্য যে চীনে দক্ষিণ চীন সাগৰৰ ৯০% এলেকা নিজৰ বুলি দাবী কৰি অহাৰ ফলত জাপান, ফিলিপাইন্সসহ একাধিক দেশৰ সৈতে সংঘাত বৃদ্ধি পাইছে বৃইজিঙৰ।
বিশ্ব বাণিজ্যৰ ক্ষেত্ৰৰ অতি গুৰুত্বপূৰ্ণ এই অঞ্চলটোত বাৰ্ষিক ৩ ট্ৰিলিয়ন মাৰ্কিন ডলাৰৰ আন্তৰ্জাতিক বাণিজ্য হয়। সেয়ে এই অঞ্চলটোৰ বাণিজ্যিক আৰু সামৰিকভাৱে অতি গুৰুত্বপূৰ্ণ বিবেচিত হৈ আহিছে।
