ক্ৰিকেট খেলপথাৰত স্লেজিং কৰাটো নতুন কথা নহয়। বেটছমেনে ছয় মাৰি বলাৰক কিবা এটা কয়, আকৌ বলাৰে আউট কৰি বেটছমেনক কটাক্ষ কৰি এটা মন্তব্য কৰে—এনে দৃশ্য বাইশ গজত প্ৰায়ে দেখা যায়।
কিন্তু সেইবুলি দুয়োপক্ষই খঙৰ ভমকত ইজনে সিজনলৈ খেদা মাৰি যোৱা, ইজনে সিজনৰ মূৰত আঘাত কৰিবলৈ চেষ্টা কৰা ঘটনা বিৰল। বুধবাৰে এন ঘটনাৰ সাক্ষী হ’ল মীৰপুৰ। বাংলাদেশ বনাম দক্ষিণ আফ্ৰিকাৰ খেল। চাৰিদিনীয়া মেচ চলি আছিল।
দ্বিতীয় দিনা দক্ষিণ আফ্ৰিকাৰ অফ স্পিনাৰ শ্বেপো এন্টুলি আৰু বাংলাদেশৰ বেটছমেন ৰিপন মণ্ডলৰ মাজত হতাহতি হয়। পৰিস্থিতি ইমানেই নিয়ন্ত্ৰণৰ বাহিৰলৈ আহিল যে আম্পায়াৰে হস্তক্ষেপ কৰিবলগীয়া হ’ল। দুয়োটা দলৰ খেলুৱৈও আগবাঢ়ি আহি দুয়োজনক আঁতৰাই নিলে। কিন্তু বাক্-বিতণ্ডা চলি থাকিল।
এন্টুলিৰ এটা অভাৰত আৰম্ভ হৈছিল ঘটনাটো। যেতিয়া ৰিপনে তেওঁৰ এটা বল মাৰি খেলপথাৰৰ বাহিৰলৈ পঠিয়াই দিলে। ছয় মাৰত বিচলিত হৈ পৰে বলাৰগৰাকী। প্ৰথমতে চাই ৰয়। তাৰ পাছত তেওঁ কিবা এটা ক’বলৈ আগবাঢ়ি গ’ল। কেৱল সেয়াই নহয়, তৰ্কটো তীব্ৰ হৈ কাজিয়ালৈ পৰিণত হ’ল।
এন্টুলিয়ে ৰিপনৰ হেলমেটত ঘুচা মাৰিলে। ৰিপনেও হেলমেটটো খুলি মাৰিবলৈ আগুৱাই গ’ল। সেই মুহূৰ্তত দুয়োটা দলৰ ক্ৰিকেটাৰ, আম্পায়াৰ কামৰুজ্জামান – সকলোৱে একেলগে আগবাঢ়ি আহিল। ক্ৰিকেটাৰ দুজনক নিয়ন্ত্ৰণ কৰিলে।
এই পৰিস্থিতিত আচৰিত হৈ ধাৰাভাষ্যকাৰ নবিল কাইজাৰে কয়, ‘এয়া সঁচাকৈয়ে সীমা চেৰাই যোৱা। ই গ্ৰহণযোগ্য নহয়। সাধাৰণতে আমি খেলপথাৰত ক্ৰিকেটাৰৰ তৰ্ক-বিতৰ্ক কৰা দেখিবলৈ পাওঁ। কিন্তু এনে কাজিয়া – কেতিয়াও নহয়। এটা সময়ত এন্টুলিয়ে ৰিপনৰ হেলমেটতো আঘাত কৰে!’
কাজিয়াখন সাময়িকভাৱে মীমাংসা হ’ল যদিও পৰিস্থিতি স্বাভাৱিক নহ’ল। পিছত এটা অভাৰত এন্টুলিয়ে আক্ৰমণাত্মক মুডত ৰিপনলৈ বলটো দলিয়াই দিয়ে। ফিল্ডিঙৰ সময়তো উত্তপ্ত শব্দবান চলি থাকিল।
উল্লেখ্য যে বাংলাদেশ আৰু দক্ষিণ আফ্ৰিকাৰ এই বিবাদ নতুন কথা নহয়। বাংলাদেশৰ জিশান আলম আৰু আন্দিল ছিমেলানে ৰাজশাহী মেচতো একেধৰণে বিবাদত লিপ্ত হয়। যাৰ বাবে দুয়োজনকে বহিস্কাৰ কৰা হয়। মীৰপুৰ কাণ্ডৰ প্ৰতিবেদন সদ্যহতে মেচ ৰেফাৰীৰ ওচৰত দাখিল কৰিছে আম্পায়াৰসকলে। প্ৰতিবেদন চাই এই বিষয়ত সিদ্ধান্ত লোৱা হ’ব বুলি জানিব পৰা গৈছে।
