২৪ ফেব্ৰুৱাৰীত ৰাছিয়াই -ইউক্ৰেইনত যুদ্ধ আৰম্ভ কৰে। ইয়াৰ প্ৰতিশোধ হিচাপে ৰাষ্ট্ৰপতি ভল’ডিমিৰ জেলেনস্কিৰ নেতৃত্বত ইউক্ৰেইনৰ সেনাই লেখতল’বলগীয়া সংগ্ৰাম অব্যাহত ৰাখিছে।
যুদ্ধৰ প্ৰথম দিনাই খবৰ বিয়পি পৰে যে ইউক্ৰেইনৰ এজন পাইলটে ৰাছিয়াৰ ৬খন যুদ্ধ বিমান ধ্বংস কৰে। কীয়েভৰ সেনাই আৰম্ভণিৰে পৰাই এনেদৰে প্ৰতিশোধ অব্যাহত ৰাখিছে। এনে পৰিস্থিতিত স্পষ্ট হৈ পৰিছে যে পুটিন চাপত পৰিছে।
খাৰকিভৰ যুদ্ধত ইউক্ৰেইনৰ জয়ে এই হেঁচা নিঃসন্দেহে আৰু অধিক ভয়াৱহ কৰি তুলিছে। ইতিমধ্যে ৰাছিয়াই দেশখনৰ দ্বিতীয় বৃহত্তম চহৰখনৰ পৰা সেনা প্ৰত্যাহাৰ কৰিছে।
লগতে পঢ়ক: আমেৰিকাত পুনৰ অঘটন: বাফেলো চুপাৰমাৰ্কেটত দুৰ্বৃত্তৰ গুলীচালনাত ১০ জন নিহত
সমগ্ৰ ইউক্ৰেইন এৰি আপাততঃ পূৱ ইউক্ৰেইন দখল কৰাৰ বাবে ৰাছিয়াৰ ব্লুপ্ৰিণ্ট এতিয়া বিফল। মাৰিঅ’প’লত সফলতা লাভ কৰাৰ পাছতো মস্কোৱে বিফলতাৰ বাহিৰে আৰু একোৱেই পোৱা নাই। এইবাৰ তেওঁলোকে খাৰকিভৰ পৰাও সেনা প্ৰত্যাহাৰ কৰিছে।
এই পৰিস্থিতিত ইউক্ৰেইনৰ ৰাষ্ট্ৰপতি জেলেনস্কিয়ে কয় যে আক্ৰমণকাৰীক প্ৰতিৰোধ কৰিবলৈ ইউক্ৰেইনৰ লোকসকলে সৰ্বোচ্চ যুঁজ দিছে। কিন্তু শেষত তেওঁ এই কথাও স্পষ্ট কৰি দিলে যে যুদ্ধত জয়ী হ’বলৈ ইউৰোপীয় দেশ আৰু অন্যান্য মিত্ৰশক্তিৰ সমৰ্থনৰো প্ৰয়োজন।
ইফালে ফিনলেণ্ড আৰু ছুইডেনে নাটোত যোগদান কৰাৰ সম্ভাৱনাকলৈ ভাবুকি দিছে পুটিনে। তেওঁ কয় যে দুই দেশে নাটোত যোগদান কৰিলে ফলাফল ভাল নহ’ব। অৱশ্যে ইউৰোপৰ দেশসমূহ এই দুখন দেশৰ সমৰ্থনতে থিয় দিছে। ইয়াৰ মাজতে খাৰকিভৰ পৰা ৰাছিয়াৰ সৈন্য প্ৰত্যাহাৰে যে ৰাছিয়াৰ ওপৰত হেঁচা বৃদ্ধি কৰিছে তাত কোনো সন্দেহ নাই।
লগতে পঢ়ক: পথ দুৰ্ঘটনাত মৃত্যু অষ্ট্ৰেলিয়াৰ প্ৰাক্তন ক্ৰিকেটাৰ এণ্ড্ৰিউ চাইমণ্ডছৰ
আনহাতে, বেলাৰুছ সেনাৰ মুখ্য সেনাধ্যক্ষ জেনেৰেল ভিক্টৰ গুলেভিচে ইউক্ৰেইন আক্ৰমণত জড়িত থকাৰ কথা অস্বীকাৰ কৰিছে। গুলেভিচে কৈছে যে দুয়োখন দেশৰ সংঘাতৰ মাজতে আমেৰিকা আৰু নাটো দেশসমূহে ইউক্ৰেইনৰ সীমান্তত নিজৰ সৈন্যৰ সংখ্যা বৃদ্ধি কৰি আছে। ইয়াক ৰোধ কৰিবলৈ বেলাৰুছ চৰকাৰে ইউক্ৰেইনৰ সীমান্তত বিশেষ বাহিনী মোতায়েন কৰিছে। সেই পদক্ষেপটো বহুত সাৱধানতাত লোৱা হৈছে। প্ৰত্যক্ষ আক্ৰমণ বা সংঘাতৰ উদ্দেশ্যৰে কৰা হোৱা নাই।
