আসাম ৰাইফল আৰু অৰুণাচল আৰক্ষীৰ যৌথ অভিযানত চাংলাঙত আলফা (স্বা:) এজন দুৰ্ধৰ্ষ কেডাৰ আটক হোৱাৰ বাতৰি পোৱা গৈছে৷ চাংলাঙৰ খিমীয়াং, ইয়ানমং আৰু নৈটাং অঞ্চলত এই অভিযান চলিছিল।
আটকাধীন সদস্যজনক ৰূপান্তৰ অসম ওৰফে ডাৱৰ অসম বুলি চিনাক্ত কৰা হৈছে। জানিব পৰা মতে ২০১৬ চনত আলফা (স্বা:)ত যোগদান কৰা দুৰ্ধৰ্ষ আলফা সদস্যজন পৰেশ বৰুৱাৰ অতি ঘনিষ্ঠ।
তেওঁৰ পৰা এটা MQ 81 ৰাইফল দুটা মেগজিন আৰু ৪৯ টা সক্ৰিয় গুলী উদ্ধাৰ কৰা হয়।
তিনিচুকীয়া জিলাৰ ধলা আৰক্ষী থানাৰ অন্তৰ্গত মালভোগ লাওপানী গাঁৱৰ তথা ম্যনামাৰত প্ৰশিক্ষণপ্ৰাপ্ত কেডাৰ জনে আলফাত যোগদানৰ পূৰ্বে চেন্নাইত এটা প্ৰাইভেট কোম্পানীত কাম কৰিছিল বুলি সেনা-আৰক্ষীৰ সূত্ৰত প্ৰকাশ।
বাৰ্মিজৰ লগতে আন বহু কেইটা ভাষা জনা ৰূপান্তৰ ওৰফে ডাৱৰ অসমৰ আটক আলফা (স্বা:)ৰ বাবে মুখ্যম আঘাত বুলি বিবেচিত হৈছে৷
সূত্ৰত প্ৰকাশ পোৱা মতে ম্যানমাৰ সেনাই উত্তৰ-পূৱৰ উগ্ৰপন্থীৰ বিৰুদ্ধে অভিযান অব্যাহত ৰখাৰ মাজতে আলফা(স্বা:) ২০/২২ জনিয়া এটা দল আন্তৰ্জাতিক সীমান্ত পাৰ হৈ অৰুণাচলত প্ৰৱেশৰ তথ্য সেনাৰ চোৰাংচোৱাৰ হাতত আছিল আৰু এই তথ্যৰ ভিত্তিতে আজি কেডাৰগৰাকী আটক হ’ব লগা হ’ল।
আনহাতে অৰুণাচলত প্ৰৱেশ কৰা আলাফা (স্বা:) দলৰ লগত বহু অত্যাধুনিক অস্ত্ৰ-শস্ত্ৰ আছে আৰু অসমত প্ৰৱেশৰ বাবে সুযোগৰ অপেক্ষাত আছে বুলি একেটা সূত্ৰত প্ৰকাশ৷
