তালাপৰ শংকৰ চাহ বাগিচাৰ কৰ্মচাৰী এজনৰ শেহতীয়া “অপহৰণ”ৰ মাজতে আলফা (স্বাধীন) কেডাৰ ৰিতুৰাজ অসম ওৰফে গিৰীণ ফুকন শনিবাৰে তিনিচুকীয়াত নিৰাপত্তা বাহিনীৰ জালত পৰিছে।
জিলাখনৰ অসম-অৰুণাচল প্ৰদেশ সীমান্তৰ বৰডুমছাত আলফা (স্বাঃ) কেডাৰজনক আটক কৰা হৈছে।
তিনিচুকীয়া আৰক্ষী, ভাৰতীয় সেনাৰ ২৩ পঞ্জাৱ ৰেজিমেণ্ট, ২১ পেৰা স্পেচিয়েল ফ’ৰ্চ আৰু ২১০ ক’ব্ৰা বেটেলিয়নৰ এক যৌথ বাহিনীয়ে চোৰাংচোৱা সূত্ৰৰ পম খেদি চলোৱা অভিযানত ফুকনক আটক কৰা হৈছে।
ম্যানমাৰৰ আলফা (স্বাঃ) শিবিৰৰ পৰা ঘূৰি অহা ফুকনৰ পৰা এটা এ কে ৮১ ৰাইফল, দুটা মেগাজিন আৰু ৭.৬২এম এম পিষ্টলৰ ৬০ ৰাউণ্ড সক্ৰিয় গুলী জব্দ কৰা বুলি আৰক্ষীৰ সূত্ৰত প্ৰকাশ।
ফুকনৰ ঘৰ তিনিচুকীয়া জিলাৰ মাকুমৰ শুকানি গাঁৱত বুলি জানিব পৰা গৈছে৷
ফুকন আলফা (স্বাঃ) নেতা উদয় অসমৰ ঘনিষ্ঠ বুলি চোৰাংচোৱা সূত্ৰত প্ৰকাশ।
সূত্ৰমতে, ফুকনে কিছুদিন পূৰ্বে উদয় অসমৰ সৈতে অসমত প্ৰৱেশ কৰিছিল।
ম্যানমাৰত এন এছ চি এন (খাপ্লাং)কে ধৰি উত্তৰ-পূবৰ উগ্ৰপন্থী শিবিৰসমূহত টাতমাদাওৰ অভিযানৰ পিছত ইয়াৰ পূৰ্বেও আলফা (স্বাঃ)ৰ বহুকেইগৰাকী সদস্যই আত্মসমৰ্পণ কৰিছিল।
আলফা (স্বাঃ) কেডাৰজন আত্মসমৰ্পণৰ বাবে অসমলৈ আহিছিল নেকি বাতৰি লিখা সময়লৈকে জানিব পৰা হোৱা নাই৷
ইফালে, শংকৰ বাগিচাৰ “অপহৃত” কৰ্মচাৰী গৌৰাংগ দেবৰ সন্ধানত নিৰাপত্তা বাহিনীসমূহে অঞ্চলটোত তীব্ৰ অভিযান আৰম্ভ কৰিছে।
