উমৰাংছুৰ কয়লা খনিত এক মৰ্মান্তিক দুৰ্ঘটনাই জোকাৰি গৈছে ৰাজ্য। উমৰাংছুৰ কয়লা খনি ভাঙি ২০ জনৰো অধিক লোকৰ প্ৰাণহানি হয়। এই ঘটনাত ডিমা হাছাওৰ মুখ্য ন্যায়িক দণ্ডাধীশ এছ চাণ্ডাই উমৰাংছু থানাৰ ভাৰপ্ৰাপ্ত বিষয়াক ডিমা হাছাও স্বায়ত্তশাসিত পৰিষদৰ মুখ্য কাৰ্যবাহী সদস্য দেব’লাল গৰলোচাৰ পত্নী কনিকা হোজাইৰ বিৰুদ্ধে এফআইআৰ ৰুজু কৰিবলৈ নিৰ্দেশ দিছে। পিতুশ লাংথাছাই কনিকাৰ অবৈধ কয়লা খননৰ সৈতে জড়িত থকা অভিযোগৰ প্ৰতি সঁহাৰি জনাই এই নিৰ্দেশ দিয়া হৈছে।
আদালতে ডিমা হাছাওৰ আৰক্ষী অধীক্ষকক এই নিৰ্দেশ অসমৰ আৰক্ষী সঞ্চালক প্ৰধানলৈ প্ৰেৰণৰ নিৰ্দেশ দিছে। ইতিমধ্যে বিশেষ তদন্তকাৰী দল গঠন কৰিছে। ২৩ এপ্ৰিলৰ শুনানিত এই নিৰ্দেশ পালনৰ বিষয়ে পৰ্যালোচনা হ’ব। লাংথাছা আৰু কোমে কেম্পৰাইয়ে ১০ জানুৱাৰীত উমৰাংছ’ আৰক্ষীৰ ওচৰত ভাৰতীয় ন্যায় সংহিতাৰ ৩০৩ ধাৰা, পৰিৱেশ সুৰক্ষা আইন, খনি আৰু খনিজ আইনৰ অধীনত অভিযোগ দাখিল কৰিছিল।
তেওঁলোকে অভিযোগ কৰে যে কনিকাৰ পৃষ্ঠপোষকতাত অবৈধ খনন চলিছিল বুলি এএমডিচিৰ নথি পোৱা গৈছে। কিন্তু আৰক্ষীয়ে কেৱল সাধাৰণ ডায়েৰী এণ্ট্ৰি কৰি এফআইআৰ ৰুজু কৰাৰ পৰা বিৰত থাকে।
আদালতে উল্লেখ কৰিছে যে লাংথাছাৰ অভিযোগে ৭ জানুৱাৰীৰ প্ৰসেনজিৎ কেম্পৰাইৰ অভিযোগতকৈ গভীৰ ষড়যন্ত্ৰৰ ইংগিত বহন কৰিছে, অভিযোগ আনুসৰি কনিকাক মূল আভিযুক্ত হিচাপে উল্লেখ কৰা হৈছে। এই ট্ৰেজেডীয়ে প্ৰশাসনিক ত্ৰুটি আৰু উচ্চপদস্থ ব্যক্তিৰ সম্ভাৱ্য জড়িত থকা দিশটো উন্মোচন কৰিছে। অভিযুক্তই উচিত শাস্তি লাভ কৰিব নে ক্ষমতাৰ বলেৰে ৰেহাই পাব সেয়া লক্ষণীয় হ’ব।
