মণিপুৰৰ চান্দেল জিলাত থকা অসম ৰাইফলছৰ চকীত বৃহস্পতি বাৰে অচিনাক্ত অস্ত্ৰধাৰী উগ্ৰপন্থীয়ে আক্ৰমণ চলায়।
জানিব পৰা মতে, অচিনাক্ত অস্ত্ৰধাৰী উগ্ৰপন্থী দলটোৱে চান্দেল জিলাত থকা অসম ৰাইফলছৰ কাচিবুং চকীক লক্ষ্য কৰি গুলীবৰ্ষণ কৰে।
কাচিবুং চকী মোলচা আৰক্ষী থানাৰ অন্তৰ্গত।
উগ্ৰপন্থী দলটোৰ আক্ৰমণৰ সময়ত চকীটোত থকা অসম ৰাইফলছৰ জোৱান সকলে উচিত প্ৰত্যুত্তৰ দিয়ে আৰু অসম ৰাইফলছৰ জোৱানৰ প্ৰত্যুত্তৰত উগ্ৰপন্থী দলটোৱে পলাই যাবলৈ বাধ্য হয়।
মণিপুৰৰ বিদ্ৰোহী সংগঠন পিপ’ল লিবাৰেশ্যন আৰ্মিয়ে (পি এল এ) এই আক্ৰমণৰ দায়িত্ব স্বীকাৰ কৰিছে।
তথ্য মতে, পি এল এ আৰু মণিপুৰ নাগা পিপ’লছ ফ্ৰণ্টে যুটীয়াভাৱে সংঘটিত কৰিছিল।
নিশা প্ৰায় ২.৩০ বজাত সংঘটিত আক্ৰমণৰ সময়ত উগ্ৰপন্থী সকলে আসম ৰাইফলছৰ চকীলৈ হস্তনিৰ্মিত বোমাও নিক্ষেপ কৰে।
দুয়ো পক্ষৰ মাজত প্ৰায় ৩০ মিনিট সময় ধৰি প্ৰচণ্ড গুলীয়াগুলী অব্যাহত থাকে।
আক্ৰমণত অসম ৰাইফলছৰ কোনো জোৱান হতাহত হোৱা নায় বুলি জানিব পৰা গৈছে।
উল্লেখযোগ্য যে, এন বিছেশ্বৰ সিঙে ১৯৭৮ চনৰ ২৫ চেপ্টেম্বৰত পি এল এ স্থাপন কৰি স্বাধীন আৰু পৃথক মণিপুৰ গঠনৰ বাবে বিদ্ৰোহ অব্যাহত ৰাখিছে।
