ছাত্ৰ সংগঠনৰ পৰা ৰাজনীতিত যোগ দি ইউপিপিএলৰ প্ৰাৰ্থী হিচাপে আজি ৩০নং কোকৰাঝাৰ পূৱ(জনজাতি সংৰক্ষিত) বিধানসভা সমষ্টিৰ বাবে জিলা ৰিটাৰ্ণিং বিষয়াৰ ওচৰত নিজ মনোনয়ন দাখিল কৰে লৰেঞ্চ ইছলাৰীয়ে।
কোকৰাঝাৰ সদৰ চহৰৰ নাতিদূৰৈৰ গ্ৰীণ ফিল্ডৰ পৰা কেবা সহস্ৰাধিক সমৰ্থকৰ স’তে কেবা কিলোমিটাৰ সমদল কৰি আহি জিলা উপায়ুক্তৰ কাৰ্যালয়ত উপস্থিত হৈ ৰিটাৰ্নিং বিষয়াৰ ওচৰত নিজ মনোনয়নপত্ৰ দাখিল কৰে লৰেঞ্চ ইছলাৰীয়ে।
সংবাদ মাধ্যমৰ স’তে হোৱা বাৰ্তালাপত লৰেঞ্চ ইছলাৰীয়ে কয় যে বিগত ৩০ বছৰে বিধায়িকা, মন্ত্ৰী হৈ থকা প্ৰমিলা ৰাণী ব্ৰহ্মই সমষ্টিৰ উন্নয়নত কোনোধৰণৰ গুৰুত্ব প্ৰদান নকৰিলে আৰু ৰাইজৰ জলন্ত সমস্যাসমূহ এটাও সমাধান নকৰিলে।
প্ৰমিলা ৰাণী ব্ৰহ্মৰ বিৰুদ্ধে তেওঁ বিজয় নিশ্চিত বুলি দাবী কৰি সমন্বয়, শান্তি আৰু নিৰাপত্তাৰ বিটিআৰ গঢ়াই মূল লক্ষ্য বুলি সদৰি কৰিছে। চৰকাৰ বিজেপি-ইউপিপিএলৰে হ’ব বুলি মন্তব্য কৰি আজিকালি ভোটাৰ ৰাইজে চৰকাৰৰ লগত থাকিহে উন্নয়ন বিচাৰে বুলি তাৎপৰ্যপূৰ্ণ মন্তব্য কৰে ইছলাৰীয়ে।
উল্লেখ্য যে হেভীৱেইট প্ৰমিলা ৰাণী ব্ৰহ্মৰ বিৰুদ্ধে এইবাৰ লৰেঞ্চ ইছলাৰীয়ে প্ৰতিদ্বন্দ্বিতাত কৰাত ৩০নং কোকৰাঝাৰ পূৱ(জনজাতি সংৰক্ষিত) বিধানসভা সমষ্টিৰ নিৰ্বাচনী যুঁজখন আকৰ্ষণীয় হৈ পৰিছে।
