কেন্দ্ৰীয় চৰকাৰৰ ৬.৩৮ লাখ খালী পদ আছে। ব্যক্তিগত, ৰাজহুৱা অভিযোগ তথা পেঞ্চন মন্ত্ৰ্যালয়ে মঙলবাৰে সংসদত এই তথ্য দাঙি ধৰিছে।
মন্ত্ৰ্যালয়ৰ মতে প্ৰায় ১.৩৪ লাখতকৈয়ো অধিক পদ ২০১৯-২০ বৰ্ষত পূৰণ কৰা হ’ব।
এই ৬,৮৩,৮২৩ টা পদত নিযুক্তি দিবৰ বাবে চৰকাৰী সংস্থা য়ুনিয়ন পাব্লিক চাৰ্বিছ কমিশ্যন (UPSC), ৰেইলৱে ৰিক্ৰুইটমেন্ট বোৰ্ড (RRB) আৰু ষ্টাফ চিলেকশ্যন কমিশ্যন (SSC)ক দায়িত্ব দিয়া হৈছে।
মন্ত্ৰ্যালয়ৰ মতে, UPSC য়ে ৪,৩৯৯টা পদ আৰু SSC য়ে ১৩,৯৯৫টা পদত নিযুক্তি দিব।
আনহাতে, সৰ্বাধিক ১,১৬,৩৯১টা পদ RRB য়ে পূৰণ কৰিব।
তদুপৰি, অসামৰিক প্ৰতিৰক্ষাৰ ২৭,৬৫২টা পদকে ধৰি এছ এছ চি, আৰ আৰ বি, ডাকসেৱা পৰিষদ আৰু প্ৰতিৰক্ষা মন্ত্ৰ্যালয়কে ধৰি কেইবাটাও সংস্থাই ৩,১০,৮৩২টা খালী পদ পূৰণৰ প্ৰক্ৰিয়া চলি আছে বুলি লোকসভাত জানিব দিয়া হৈছে।
চৰকাৰী নিয়ম অনুসৰি, নতুনকৈ সৃষ্টি কৰা পদ এটা যদি দুই/তিনি বছৰৰ অধিক সময় খালী হৈ পৰি থাকে, ইয়াক বাতিল কৰা হয়।
মন্ত্ৰ্যালয়ৰ মতে, এইটো নহ’বলৈ কেইবাটাও ব্যৱস্থা গ্ৰহণ কৰা হৈছে।
