ক্ৰমাৎ তিক্ত হৈ গৈ আছে বিশ্বৰ দুই শক্তিধৰ ৰাষ্ট্ৰ আমেৰিকা আৰু চীনৰ দ্বিপাক্ষিক সম্পৰ্ক।
এই তিক্ততা বৃদ্ধিৰ সময়তে আমেৰিকাই চীনৰ নিজৰ অঞ্চল বুলি দাবী কৰি অহা টাইৱানলৈ প্ৰেৰণ কৰিব আৰু বৃহৎ পৰিমাণৰ সামুদ্ৰিক মিছাইল।
সোমবাৰে আমিৰেকাই বেইজিঙৰ বাধাকো ভ্ৰক্ষেপ নকৰি টাইৱানক ২.৪ বিলিয়ন মূল্যৰ ১০০ হাৰ্প’ন সামুদ্ৰিক মিছাইল বিক্ৰীৰ প্ৰস্তাৱত অনুমোদন জনাইছে।
যোৱা সপ্তাহটো স্বায়ত্ত শাসিত গণতান্ত্ৰিক দ্বীপ ৰাষ্ট্ৰ টাইৱানক ১ বিলিয়ন মিছাইল অৰ্পণ কৰাৰ এক চুক্তিত স্বাক্ষৰ কৰিছিল আমেৰিকাই।
“আমি টাইৱানৰ নিৰাপত্তা উন্নত কৰাৰ লগতে ৰাজনৈতিক সুস্থিৰতা বৰ্তি থকাত সহায় কৰিব খুজিছো। অঞ্চলটোত সামৰিক ভাৰসাম্যতাও ৰক্ষা হোৱাটো বিচাৰিছো।” টাইৱানক ২.৪ বিলিয়ন সামুদ্ৰিক মিছাইল বিক্ৰীৰ বাবে অনুমোদন জনোৱাৰ পিছত মাৰ্কিন কৰ্তৃপক্ষই এইদৰে কয়।
টাইৱানক প্ৰদান কৰিবলগীয়া মিছাইলসমূহৰ মাজত আছে ১০০ হাৰ্প’ন ক’ষ্টল ডিফেনছ চিষ্টেম(HCDS), ১২৫ কিলোমিটাৰৰ দূৰত্বত আঘাত হানিব পৰা ৪০০ RGM-84L-4 হাৰ্প’ন ব্লক ll চাৰ্ফেছ লান্সড্ মিছাইল।
ব’য়িঙে নিৰ্মাণ কৰা এই মিছাইলসমূহ স্থায়ী ভাৱে নিৰ্মাণ কৰি লোৱা ঢিপ বা সাজু কৰি ৰখা ট্ৰাকৰ পৰা নিক্ষেপ কৰিব পাৰি।
উল্লেখ্য যে, গণতান্ত্ৰিকভাৱে স্বশাসিত টাইৱানত প্ৰতি মুহূৰ্ততে চীনে নিজৰ কৰ্তৃত্ব জাহিৰ কৰি আহিছে।
ইফালে টাইৱানত চীনে নিজৰ কদৰ বৃদ্ধি কৰিবলৈ যৎপৰোনাস্তি চেষ্টা কৰি আহিছে। ২০১৬ চনত নিৰ্বাচিত টাইৱানৰ ৰাষ্ট্ৰপতি টাই ইঙ-ৱানে টাইৱানক চীনৰ অংগ নহয় বুলি ঘোষণা কৰি এখন স্বাধীন ৰাষ্ট্ৰ বুলি দাবী কৰি আহিছে।
দ্বীপ ৰাষ্ট্ৰ টাইৱানৰ জনতাইও চীনৰ আগ্ৰাসনৰ বিৰুদ্ধে তীব্ৰ গণ আন্দোলন কৰি আহিছে।
ইফালে চলিত মাহত টাইৱানৰ আকাশমাৰ্গত চীনা বায়ু সেনাই সঘনাই প্ৰৱেশ কৰা বুলিও অভিযোগ উঠিছে।
এনে এক উত্তেজনাময় পৰিৱেশত মাৰ্কিন যুক্তৰাষ্ট্ৰই টাইৱানলৈ বৃহৎ পৰিমাণৰ সামুদ্ৰিক মিছাইল বিক্ৰীৰ প্ৰস্তাৱত অনুমোদন জনোৱা কাৰ্যই উক্ত সামুদ্ৰিক অঞ্চলটোত উত্তেজনা আৰু বৃদ্ধি পোৱা পৰিলক্ষিত হৈছে।
