যুদ্ধই জুৰুলা কৰা ইউক্ৰেইনক আমেৰিকাই দিব ৩৫০ নিযুত ডলাৰৰ সামৰিক সাহায্য
আমেৰিকা, ব্ৰিটেইনকে ধৰি বিশ্বৰ বহু উন্নত দেশৰ বাধাৰ পিছতো ৰাছিয়াই ইউক্ৰেইনত অব্যাহত ৰাখিছে আক্ৰমণ।
আমেৰিকাই ৰাছিয়াই আৰম্ভ কৰা এই যুদ্ধ খনক ‘অযুক্তিকৰ’ যুদ্ধ আখ্যা দিছে।
ইউক্ৰেইনৰ বিপদৰ সময়ত হোৱাইট হাউছে এতিয়া দেশ খনৰ ওচৰত থিয় দিছে।
সামৰিক শক্তিৰে প্ৰত্যক্ষ ভাবে নহ’লেও অৰ্থনৈতিক সাহায্যৰে আমেৰিকাই ইউক্ৰেইনক সহায় কৰিবলৈ আগবাঢ়ি আহিছে।
যুদ্ধৰ ফলত ইউক্ৰেইনৰ অৰ্থনীতি বিধ্বস্ত হৈ পৰিছে।
ৰাছিয়াৰ সেনাৰ আক্ৰমণৰ বাবেই ধ্বংসপ্ৰাপ্ত হৈছে বিমান বন্দৰ, তেলৰ খাদ আদি।
বহু ব্যৱসায়িক অঞ্চল এতিয়া বোমাৰ আঘাতত তছনছ হৈ পৰিছে।
এনে সময়তে আমেৰিকাই কিয়েভলৈ আগবঢ়াইছে বিশাল মাত্ৰাৰ সামৰিক সাহায্য।
মাৰ্কিন বিদেশ সচিব এণ্টনি ব্লিঙ্কেনে আজি কয় যে আমেৰিকাই ইউক্ৰেইনক তাৎক্ষণিকভাবে ৩৫০ নিযুত ডলাৰৰ সামৰিক সাহায্য আগবঢ়াব।
পৰৱৰ্তী সময়তো ইউক্ৰেইনৰ সহায়ৰ বাবে আমেৰিকাই দুৱাৰ মুকলি ৰাখিব বুলি তেওঁ কয়।