দাক্ষিণাত্যৰ চহৰ বাংগালুৰুৰ এখন হোটেলত উদ্ধাৰ হৈছে এগৰাকী বিদেশী মহিলাৰ মৃতদেহ। মৃত মহিলাগৰাকী উজবেকিস্তানৰ বুলি প্ৰকাশ কৰিছে আৰক্ষীয়ে। এই ঘটনাই এতিয়া সৃষ্টি কৰিছে তীব্ৰ চাঞ্চল্যৰ।
প্ৰকাশিত খবৰ অনুসৰি, বাংগালুৰুৰ শেশাদ্ৰীপুৰম অঞ্চলৰ জগদীশ হোটেলৰ কোঠাত মহিলাগৰাকীৰ মৃতদেহ উদ্ধাৰ হয়। জৰীনা নামৰ এই ৩৭ বৰ্ষীয় মহিলাগৰাকী চাৰিদিন পূৰ্বে টুৰিষ্ট ভিছাৰে বেংগালুৰুত উপস্থিত হৈছিল।
আৰক্ষীয়ে সদৰী কৰ মতে, বুধবাৰে বিয়লি ৪.৩০ বজাত হোটেলৰ কৰ্মচাৰীয়ে দ্বিতীয় মহলাত থকা জৰীনাৰ কোঠাত টোকৰ মাৰে যদিও কোনো সঁহাৰি লাভ নকৰে। তেওঁলোকে তেতিয়া হোটেলৰ মাষ্টাৰ চাবিৰে দুৱাৰৰ তলা খুলি কোঠাত প্ৰৱেশ কৰে।
কোঠাৰ ভিতৰত মহিলাগৰাকীক মৃত অৱস্থাত পৰি থকা প্ৰত্যক্ষ কৰে কৰ্মচাৰীসকলে। ইয়াৰ পিছতে হোটেলৰ মেনেজাৰে তাৎক্ষণিকভাৱে আৰক্ষীক এই সন্দৰ্ভত অৱগত কৰে। তেওঁৰ অভিযোগৰ ভিত্তিত আৰক্ষীয়ে এটা গোচৰ ৰুজু কৰে।
ঘটনাস্থলীত উপস্থিত হৈ আৰক্ষীয়ে জনোৱা প্ৰাথমিক তদন্ত আৰম্ভ কৰে। মহিলাগৰাকী হত্যাৰ বলি হোৱা বুলি আৰক্ষীয়ে সন্দেহ প্ৰকাশ কৰিছে যদিও এতিয়ালৈকে কোনো প্ৰমাণ লাভ কৰা নাই বুলি জানিবলৈ দিয়ে।
মৃত্যুৰ কাৰণ নিশ্চিতিৰ বাবে জৰীনাৰ মৃতদেহ মৰণোত্তৰ পৰীক্ষাৰ বাবে লগে লগে চিকিৎসালয়লৈ প্ৰেৰণ কৰা বুলি আৰক্ষীয়ে সদৰী কৰিছে। কোনো লোকে জৰীনাৰ কোঠাত প্ৰৱেশ কৰিছিল নেকি জানিবলৈ হোটেলখনৰ চিচিটিভি আৰু ৰেজিষ্টাৰ পৰীক্ষা কৰি আছে বুলিও আৰক্ষীয়ে লগতে প্ৰকাশ কৰে।
