অসমৰ সাংস্কৃতিক জগতত শূন্যতাৰ সৃষ্টি কৰি বৰ্ষীয়ান যশস্বী অভিনেতা-পৰিচালক কুলদা কুমাৰ ভট্টাচাৰ্যৰ দেহাৱসান ঘটিছে। মহানগৰীৰ দিছপুৰ হাস্পাতালত শুকুৰবাৰে নিশা ৮:২০ বজাত শেষ নিশ্বাস ত্যাগ কৰে অভিনেতাগৰাকীয়ে। বিগত দুদিন ধৰি ভট্টাচাৰ্য হাস্পাতালখনৰ আই চি ইউৰ ভেণ্টিলেচনত ভৰ্তি হৈ আছিল। মৃত্যুৰ সময়ত তেওঁৰ বয়স আছিল ৯১ বছৰ।
জানিব পৰা মতে, শনিবাৰে পুৱা ভট্টাচাৰ্যৰ নশ্বৰ দেহ তেওঁৰ ৰিহাবাৰীৰ বাসগৃহলৈ নিয়া হ’ব। আত্মীয়-স্বজনৰ উপস্থিতিত বাসগৃহত আনুষ্ঠানিকতা সম্পন্ন কৰাৰ পাছত তেওঁৰ নশ্বৰ দেহ অনুৰাগীসকলে অন্তিম দৰ্শন তথা শেষ শ্ৰদ্ধা জ্ঞাপনৰ বাবে উজানবজাৰস্থিত সূৰ্যলৈ লৈ যোৱা হ’ব। তাতেই দুপৰীয়া ১২ বজালৈ সূৰ্যত ভট্টাচাৰ্যৰ নশ্বৰ দেহ ৰাজহুৱা শ্ৰদ্ধাঞ্জলিৰ বাবে ৰখোৱা হ’ব।
অবিবাহিত ভট্টাচাৰ্যই তেওঁৰ দেহ এবছৰ পূৰ্বেই ইলোৰা বিজ্ঞান মঞ্চক দান কৰি থৈছে। সেয়েহে ৰাজহুৱা শ্ৰদ্ধাঞ্জলিৰ পিছতে ভট্টাচাৰ্যৰ নশ্বৰ দেহ ইলোৰা বিজ্ঞান মঞ্চই চমজি ল’ব।
মহানগৰীৰ পাণবজাৰৰ যশোৱন্ত ৰ’ড নিবাসী অধিবক্তা পিতৃ কালিপ্ৰসন্ন ভট্টাচাৰ্য আৰু মাতৃ কমলা দেৱীৰ তৃতীয় সন্তান কুলদা কুমাৰ ভট্টাচাৰ্যৰ ১৯৩৩ চনৰ ১৮ আগষ্টত জন্ম হয়। তেওঁ ১৯৪৬ চনত মেট্ৰিকুলেচন পৰীক্ষা আৰু কটন কলেজৰ পৰা বি এ ডিগ্ৰী সমাপ্ত কৰাৰ পিছত গুৱাহাটী বিশ্ববিদ্যালয়ৰ পৰা বুৰঞ্জী বিষয়ত এম এ ডিগ্ৰী লাভ কৰে। তেওঁ লণ্ডন আৰু জাৰ্মানীত মঞ্চকলা, অভিনয় আৰু টেলিভিছন বিষয়ত শিক্ষা গ্ৰহণ কৰিছিল।
১৯৬১ চনত ‘শকুন্তলা’ ছবিৰ জৰিয়তে অসমীয়া চলচ্চিত্ৰ জগতত খোজ পেলোৱা অভিনেতাগৰাকীয়ে ‘লটিঘটি’, ‘চিকমিক বিজুলী’, ‘প্ৰভাতী পখীৰ গান’, ‘ৰামধেনু’, ’দিকচৌ বনত পলাশ’, ‘ভিলেজ ৰকষ্টাৰ্ছ’ আদিকে ধৰি কেইবাখনো ছবিত অভিনয় কৰিছিল। দূৰদৰ্শনৰ কেইবাখনো ধাৰাবাহিকত অভিনয় কৰাৰ উপৰিও ‘তেজাল ঘোঁৰা’ নামৰ এখন জনপ্ৰিয় ধাৰাবাহিকো তেওঁ পৰিচালনা কৰিছিল। তদুপৰি, তেওঁ কেইবাখনো তথ্যচিত্ৰও নিৰ্মাণ কৰিছিল।
কুলদা কুমাৰ ভট্টাচাৰ্য এগৰাকী প্ৰখ্যাত অনাতাঁৰ শিল্পী, অভিনেতা তথা পৰিচালক আছিল। তেওঁ গুৱাহাটী অনাতাঁৰ কেন্দ্ৰযোগে প্ৰচাৰিত ৰেডিঅ’ নাট ‘পৰশুৰাম’ত অভিনয়ৰ যোগেদি জনপ্ৰিয়তা লাভ কৰিছিল।
ভট্টাচাৰ্যই ১৯৬০ চনত অসম জাতীয় নাট্যশালা প্ৰতিষ্ঠা কৰিছিল। শেহতীয়াকৈ তেওঁ ৬৯ সংখ্যক ৰাষ্ট্ৰীয় চলচ্চিত্ৰ বঁটা’ত শ্ৰেষ্ঠ ধাৰাভাষ্যকাৰ হিচাপে সন্মান লাভ কৰে। কুলদা কুমাৰ ভট্টাচাৰ্যই ‘হাতীবন্ধু’ ছবিখনৰ ধাৰাভাষ্যকাৰ হিচাপে এই সন্মান লাভ কৰে। কুলদা কুমাৰ ভট্টাচাৰ্যৰ ইংৰাজীৰ উপৰিও অসমীয়া, বঙালী আৰু হিন্দী আটাইকেইটা ভাষাতে দখল আছিল। তেওঁ এগৰাকী সফল আবৃত্তিকাৰো আছিল।
ড॰ ভূপেন হাজৰিকা আঞ্চলিক চৰকাৰী চলচ্চিত্ৰ আৰু টেলিভিছন প্ৰতিষ্ঠান (জ্যোতি চিত্ৰবন)-ৰ প্ৰতিষ্ঠাপক সঞ্চালক আছিল কুলদা কুমাৰ ভট্টাচাৰ্য। ৰাষ্ট্ৰীয় চলচ্চিত্ৰ প্ৰতিযোগিতা আৰু ইণ্ডিয়ান পেনোৰামাৰ বাবে তেওঁ দুবাৰকৈ জুৰীৰ সদস্য নিৰ্বাচিত হৈছিল। এগৰাকী সুলেখক হিচাপে কুলদা কুমাৰ ভট্টাচাৰ্যই বিভিন্ আগশাৰীৰ কাকত-আলোচনীত চলচ্চিত্ৰ, ক্ৰীড়া বিষয়ক বিভিন্ন প্ৰবন্ধপাতি লিখাৰ উপৰিও কেইবাখনো গ্ৰন্থ অসমীয়ালৈ অনুবাদো কৰিছে।
