আছুক ‘ৰাজনৈতিক দল’ আখ্যা দিয়া হিমন্তৰ ‘অৰাজনৈতিক’ মাতৃয়ে নিজে জয়ন্ত মল্লৰ হৈ চলালে প্ৰচাৰ
নতুন আঞ্চলিক ৰাজনৈতিক শক্তি অসম জাতীয় পৰিষদ জন্ম হোৱাৰ পাছত বিভিন্ন সময়ত আছুৱে অ-ৰাজনৈতিক চৰিত্ৰ হেৰুৱাই পেলাইছে বা আছু এতিয়া ৰাজনৈতিক দললৈ ৰূপান্তৰিত হৈছে বুলি মন্ত্ৰী ড০ হিমন্ত বিশ্ব শৰ্মাই কটাক্ষ কৰি আহিছিল।
তেনেস্থলত অসম সাহিত্য সভাৰ দৰে এটা পবিত্ৰ জাতীয় অনুষ্ঠানৰ ৰাজ্যিক উপ-সভাপতিৰ দায়িত্বত থাকিও মন্ত্ৰী হিমন্ত বিশ্ব শৰ্মাৰ মাতৃয়ে এতিয়া এজনৰ পাছত আন এজন বিজেপি প্ৰাৰ্থীৰ হৈ চলাই গৈছে নিৰ্বাচনী প্ৰচাৰ।
প্ৰশ্ন হৈছে ‘অসম সাহিত্য সভাই নিজৰ জাতীয় চৰিত্ৰ হেৰুৱাই পেলাইছে নেকি?’ তথা ‘অসম সাহিত্য সভা অ-ৰাজনৈতিক হৈয়ো একাংশই কিয় ৰাজনীতিৰ ৰহন সনাৰ চেষ্টা চলাইছে?
কালি নলবাৰী বিধানসভা সমষ্টিৰ বিজেপি প্ৰাৰ্থী তথা কংগ্ৰেছৰ দিনত দাদা বিগ্ৰেডৰ অন্যতম জয়ন্ত মল্ল বৰুৱাৰ হৈ নিৰ্বাচনী প্ৰচাৰ সভাত অংশগ্ৰহণ কৰে অসম সাহিত্য সভাৰ উপ-সভাপতি মৃণালিনী দেৱীয়ে। তাক লৈ জনসাধাৰণৰ মনত নানান প্ৰশ্নৰ সূচনা হৈছে।
বুধবাৰে নলবাৰী চহৰৰ ৪ নং ৱাৰ্ডৰ ধমধমা বাছ আস্থানত মৃণালিনী দেৱীয়ে বিজেপিৰ প্ৰাৰ্থী জয়ন্ত মল্ল বৰুৱাৰ হৈ নিৰ্বাচনী প্ৰচাৰ চলায়।
আনকি উক্ত প্ৰচাৰ সভাত নিৰ্বাচনী প্ৰচাৰ চলাই হিমন্তৰ মাতৃয়ে কয় ‘মাতৃ হিচাপে মই অসমৰ ভৱিষ্যৎ সুৰক্ষাৰ বাবে বিজেপিক আশীৰ্বাদ দিছো আৰু ৰাইজকো দলটোক আশীৰ্বাদ দিবলৈ আহ্বান জনাইছো’।
সাহিত্য সভাৰ উপ সভাপতিগৰাকীয়ে লগতে কয় যে তেওঁ অকল হিমন্তবিশ্ব শৰ্মাৰে মাতৃ নহয় অসমবাসীৰে মাতৃ, সেইবাবে মৰম স্নেহ আৰু আশীৰ্বাদ দিবলৈ নলবাৰীত উপস্থিত হৈছে।
উল্লেখযোগ্য যে, জালুকবাৰী সমষ্টিত যোৱা ৮ মাৰ্চৰ দিনা পুত্ৰ হিমন্ত বিশ্ব শৰ্মাৰ নিৰ্বাচনী কাৰ্য্যালয় মুকলি কৰাৰ পাছতে ৰাজ্যজুৰি বিতৰ্কৰ সূচনা হৈছিল। তেতিয়াই যোৱা ৯ মাৰ্চৰ দিনা অসম সাহিত্য সভাই তেওঁলোকৰ কোনো বিষয়ববীয়াই যাতে কোনো ৰাজনৈতিক দল বা প্ৰাৰ্থীৰ হৈ সক্ৰিয়ভাৱে জৰিত নহয় তাৰ বাবে পত্ৰযোগে নিৰ্দেশ দিছিল।
কিন্তু প্ৰশ্ন হৈছে ‘কাৰ বলত মহিয়ান হৈ বা ছত্ৰছায়াত অসম সাহিত্য সভাৰ উপ-সভাপতিৰ দৰে পদত অধিষ্ঠিত হৈয়ো মৃণালিনী দেৱীয়ে চলাই গৈছে বিজেপিৰ হৈ নিৰ্বাচনী প্ৰচাৰ?’
উল্লেখ কৰিব লাগিব যে, পুত্ৰৰ মনোনয়ন দাখিলৰ দিনাও মাতৃ মৃণালিনী দেবীয়ে সোণাৰাম খেলপথাৰৰ পৰা বাহিৰ কৰা ৰেলীত অংশগ্ৰহণ কৰিছিল।
অসম সাহিত্য সভাৰ এনে গুৰু দায়িত্বত থাকি এতিয়া এনে এটা জাতীয় অনুষ্ঠানক ৰাজনীতিৰ ৰহন সনাক কেন্দ্ৰ কৰি চৌদিশে ব্যাপক প্ৰতিক্ৰিয়াৰ সৃষ্টি হৈছে।