৯ বছৰত ৬৯টা শতক অৰ্জন কৰা কোহলীক দশকটোৰ শ্ৰেষ্ঠ ক্ৰিকেটাৰ আখ্যা এখন শীৰ্ষ মেগাজিনৰ
বিগত কিছু বছৰ ধৰি ক্ৰিকেটৰ তিনিওটা সংস্কৰণতে কেইবাটাও ৰেকৰ্ড গঢ়া ভাৰতীয় ক্ৰিকেট দলৰ অধিনায়ক বিৰাট কোহলীক জনপ্ৰিয় মেগাজিন ‘দ্যা ক্ৰিকেটাৰ’ এ দশকটোৰ শ্ৰেষ্ঠ ক্ৰিকেটাৰ হিচাপে ঘোষণা কৰিছে।
বিৰাট কোহলীৰ উপৰি এই তালিকাত ভাৰতীয় ক্ৰিকেটৰ কেইবাগৰীকও তাৰকাই স্থান লাভ কৰিছে। ইয়াৰ ভিতৰত স্পীনাৰ ৰবিচন্দ্ৰন অশ্বিন (১৪), এদিনীয়া ক্ৰিকেটত তিনিটা দ্বিশতক অৰ্জন কৰা ৰোহিত শৰ্মা (১৫), প্ৰাক্তন অধিনায়ক মহেন্দ্ৰ সিং ধোনী (৩৫), ৰবিন্দ্ৰ জাদেজা (৩৬) আৰু ৪০ নম্বৰত আছে মহিলা ক্ৰিকেটাৰ মিতালী ৰাজ।
মেগাজিনখনত কোহলীৰ বিষয়ে লিখিছ, ‘দশকটোৰ শ্ৰেষ্ঠ ক্ৰিকেটাৰৰ বাবে সৰ্বসন্মতিক্ৰমে ভাৰতীয় ক্ৰিকেটৰ অধিনায়কক নিৰ্বাচিত কৰা হৈছিল। কোহলীয়ে এইটো দশকত সৰ্বাধিক ২০,৯৬০ ৰান বনাইছে’।
বিৰাট কোহলীৰ পিছতেই সৰ্বাধিক ৰান সংগ্ৰহকাৰী বেটছমেন হ’ল দক্ষিণ আফ্ৰিকাৰ হাছিম আমলা। কিন্তু হাছিম আমলাই বিৰাট কোহলীতকৈ ৫ হাজাৰ ৰান কম কৰিছে।
ইফালে এই দশকটোতে ‘ক্ৰিকেটৰ ভগৱান’ শচীন টেণ্ডুলকাৰে এশটা শতক অৰ্জনেৰে ইতিহাস গঢ়িছিল।
এই সন্দৰ্ভত মেগাজিনখনত কোৱা হয়, ‘২০১৩ চনত এশটা শতক অৰ্জনৰ ইতিহাস গঢ়ি অৱসৰ গ্ৰহণ কৰিছিল। তেওঁৰ এই ৰেকৰ্ডৰ ওচৰত কোনেও যাব নোৱাৰিব বুলি ধাৰণা কৰিছিল যদিও ইতিমধ্যে কোহলীয়ে আন্তঃৰাষ্ট্ৰীয় ক্ৰিকেটত ৭০টা শতক অৰ্জন কৰিলে’।
উল্লেখ্য যে কোহলীৰ ৭০টা শতকৰ ৬৯টা শতকেই ২০১০ৰ পৰা ২০১৯ৰ ভিতৰত অৰ্জন কৰা।