২০১৪ চনৰ ডিচেম্বৰ মাহত তেওঁ টেষ্ট দলৰ নেতৃত্বৰ ভাৰ গ্ৰহণ কৰিছিল। ২০২২ চনৰ জানুৱাৰী মাহত তেওঁৰ হাতৰ পৰা নেতৃত্বৰ দায়িত্ব আঁতৰি যায়।
তেওঁৰ সময়খিনি ভাৰতীয় টেষ্ট ক্ৰিকেটৰ সোণালী যুগ বুলি ক’লেও অতিৰঞ্জিত কৰা নহয়। মহেন্দ্ৰ সিং ধোনীৰ পৰা নেতৃত্বৰ দায়িত্ব লয় কোহলীয়ে।
আক্ৰমণাত্মক, ফিটনেছ আৰু জয় – এনেদৰে বৰ্ণনা কৰিব পাৰি কোহলীৰ যুগটোক। কিন্তু তেওঁ দেশৰ সফল অধিনায়কসকলকো অতিক্ৰমি গৈছে। অন্ততঃ অধিনায়ক কোহলীৰ টেষ্ট পৰিসংখ্যাই সেইটোৱে কয়। কোহলীৰ নেতৃত্বত ভাৰতৰ জয়ৰ হাৰ আছিল ৫৮.৮২ শতাংশ।
কোহলীৰ নেতৃত্বত ৬৮খন টেষ্ট মেচৰ ভিতৰত ৪০খনত জয়লাভ কৰে ভাৰতে। ১৭ খনত পৰাস্ত আৰু ১১ খনত ড্র। ঘৰৰ মাটিত কোহলীৰ জয়ৰ পৰিসংখ্যা সঁচা অৰ্থত ঈৰ্ষণীয়। তেওঁৰ অধিনায়কত্বত ঘৰুৱা খেলপথাৰত ৩১খন খেলৰ ভিতৰত ২৪খন খেলত জয়লাভ কৰিছে ভাৰতে। ঘৰৰ মাটিত টেষ্ট ফৰ্মেটত ভাৰতৰ আধিপত্য ইয়াৰ পৰাই স্পষ্ট হৈ পৰিছে।
বিদেশত খেলা ৩৬খন টেষ্টৰ ভিতৰত ১৬খন টেষ্টত জয়লাভ কৰিছে কোহলীয়ে। ইয়াৰ উপৰিও তেওঁ দেশৰ প্ৰাক্তন অধিনায়ক সৌৰভ গাংগুলীকো চেৰ পেলাইছিল। সৌৰভৰ নেতৃত্বত ভাৰতে বিদেশত ১১খন টেষ্টত জয়লাভ কৰিছিল।
মহেন্দ্ৰ সিং ধোনীয়ে ৬০ খন টেষ্টত দলটোক নেতৃত্ব দিয়ে। তেওঁৰ নেতৃত্বত ভাৰতে ২৭ খনত জয়, ১৮ খনত পৰাজয় আৰু ১৫ খনত ড্ৰ কৰে। বিজয়ৰ হাৰ ৪৫ শতাংশ। ধোনীৰ নেতৃত্বত ভাৰত ঘৰৰ মাটিত এক ভয়ংকৰ শক্তি হৈ পৰিছিল। কিন্তু ধোনীয়ে বিদেশত ৬ খন টেষ্টতহে জয়লাভ কৰিছে। এইক্ষেত্ৰত তেওঁ কোহলীৰ তুলনাত বহু পিছ পৰি আছে।
সৌৰভ গাংগুলীয়ে ভাৰতীয় দলত যুঁজৰ মানসিকতা জগাই তুলিছি। তেওঁৰ নেতৃত্বত ৪৯ খন টেষ্ট মেচৰ ভিতৰত ২১ খন খেলত জয়লাভ কৰিছে ভাৰতে। সৌৰভৰ টীম ইণ্ডিয়াই ১৩ খনত পৰাস্ত হোৱাৰ বিপৰীতে ১৫ খনত ড্ৰ’ কৰে। সৌৰভৰ নেতৃত্বত টেষ্ট ক্ৰিকেটত ভাৰতৰ জয়ৰ হাৰ আছিল ৪২.৮৬ শতাংশ। বিদেশৰ মাটিত এঘাৰখন টেষ্ট জয় এসময়ত আছিল অভিলেখ। পিছত কোহলীয়ে সেই অভিলেখ ভংগ কৰে।
মহম্মদ আজহাৰুদ্দিনে ভাৰতীয় দলটোক ৪৭খন টেষ্ট মেচত নেতৃত্ব দিয়ে। এই ৪৭খন টেষ্টৰ ভিতৰত ১৪খনত ভাৰতে জয়লাভ কৰে। ১৪খনত পৰাজয় আৰু ১৯ খনত ড্ৰ’ হয়। বিজয়ৰ হাৰ ২৯.৭৮ শতাংশ। ঘৰৰ মাটিত তেওঁ অধিকাংশ জয় লাভ কৰিছে। বিদেশত অতি কম সংখ্যক মেচতহে জয়ী হৈছে আজহাৰ।
কপিল দেৱে ৩৪ খন টেষ্টত দেশক নেতৃত্ব দিছিল। মাত্ৰ ৪ খনত জয়, ৭ খনত পৰাজয়, আৰু ২২ খন ড্ৰ’ কৰিছিল। জয়ৰ হাৰ ১১.৭৬ শতাংশ। কপিলৰ নেতৃত্বত ভাৰতে বিশ্বকাপ জয় কৰে। কিন্তু টেষ্টত তেওঁৰ অভিলেখ উল্লেখযোগ্য নহয়।
সেইদৰে, ৪৭খন টেষ্টত সুনীল গাভাস্কাৰৰ নেতৃত্বত জয়ৰ হাৰ ১৯.১৪ শতাংশ। আনহাতে, ২৫খন টেষ্টত শচীন টেণ্ডুলকাৰৰ নেতৃত্বত জয়ৰ হাৰ ১৬ শতাংশ।
