৩ ডিচেম্বৰৰ পৰা কাৰ্য্যকৰী হোৱাকৈ Vodafone Idea-ই প্ৰিপেইড গ্ৰাহকৰ বাবে ইয়াৰ ডেটা প্লেনবোৰৰ মূল্য প্ৰায় ৪০ শতাংশ বৃদ্ধি কৰিছে। কোম্পানিটোৱে আজি এই বৃদ্ধিৰ বিষয়ে ঘোষণা কৰিছে।
ৰিলায়েন্স জিঅ’ৰ পিছতে সৰ্বাধিক সংখ্যক য়ুজাৰ থকা টেলিকম কোম্পানিটোৱে এ জি আৰৰ (adjusted gross revenue)বাবে সন্মুখীন হোৱা বৃহৎ লোকচানৰ পৰিপ্ৰেক্ষিতত এই সিদ্ধান্ত ল’ব লগীয়া হয়।
আনহাতে ভোদাফোন আইডিয়াৰ এই টেৰিফ ৰেইট বৃদ্ধিৰ ঘোষণাৰ পিছতে ৩ ডিচেম্বৰত এয়াৰটেলেও টেৰিফ ৰেইট ৪২ শতাংশ বৃদ্ধি কৰাৰ কথা আজি ঘোষণা কৰে।
বৰ্তমান ভোদাফোন আইডিয়াৰ প্ৰিপেইড গ্ৰাহকে ৮৪ দিনৰ ভেলিডিটিৰে দৈনিক ১.৫ জি বি 4G data লাভ কৰে ৪৪৮ টকাত। ৩ ডিচেম্বৰৰ পৰা সেই প্লেন কিনিব লাগিব ৫৯৯ টকাত। বৃদ্ধিৰ হাৰ ৩৩.৭ শতাংশ। ৮৪ দিনৰ ভেলিডিটিৰে দৈনিক ২ জি বিকৈ ডেটা পোৱা পূৰ্বৰ ৫১১ টকাৰ প্লেনটোৰ দাম কৰা হৈছে ৬৯৯ টকা, য’ত বৃদ্ধিৰ হাৰ ৩৬.৮ শতাংশ।
আন কিছুমান প্লেনত ৪০ বা ততোধিক শতাংশ দাম বৃদ্ধি কৰা হৈছে।
আনহাতে এয়াৰটেলেও ৩ ডিচেম্বৰৰ পৰা বৃদ্ধি কৰিব ইয়াৰ প্ৰিপেইড প্লেনবোৰৰ দাম। ৮৪ দিনৰ ভেলিডিটিৰ দৈনিক ১.৫ জি বি 4G data-ৰ প্লেনত এয়াৰটেলে ল’ব ৫৯৮ টকা, যিটো পূৰ্বে ৮২ দিনৰ বাবে ৪৪৮ টকা আছিল।
একেদৰে ৮২ দিনৰ ভেলিডিটিৰে দৈনিক ২ জি বিকৈ ডেটা পোৱা পূৰ্বৰ ৪৯৯ টকাৰ প্লেনটোৰ দাম কৰিব ৬৯৮ টকা আৰু ইয়াকো ৮৪ দিন কৰিব।
এয়াৰটেলেও এ জি আৰৰ (adjusted gross revenue)নামত চৰকাৰক বহু হাজাৰ কোটি টকা দিব লগীয়া হোৱাত লোকচানৰ মুখত আছে।
অচিৰেই ৰিলায়েন্স জিঅ’য়ো ইয়াৰ প্ৰিপ্ৰেইড প্লেনবোৰৰ দাম বৃদ্ধি কৰিব বুলি জানিব পৰা গৈছে।
