মমতা চৰকাৰৰ ৰাজ্যৰ শিক্ষাৰ্থীলৈ মমতা! আগবঢ়ালে ষ্টুডেন্ট ক্ৰেডিট কাৰ্ডৰ সুবিধা

পশ্চিমবংগৰ মুখ্যমন্ত্ৰী মমতা বেনাৰ্জীয়ে ষ্টুডেন্ট ক্ৰেডিট কাৰ্ড আঁচনি মুকলি কৰিছে। ৰাজ্যখনৰ শিক্ষাৰ্থীৰ বাবে বুধবাৰে মুখ্যমন্ত্ৰীগৰাকীয়ে এই আঁচনিৰ কথা ঘোষণা কৰে।

আঁচনিখন মুকলি কৰি মমতাই কয়, ‘’ছাত্ৰ-ছাত্ৰীসকল আমাৰ গৌৰৱ, দেশৰ ভৱিষ্যত। তেওঁলোকৰ সপোন যাতে বাস্তৱায়িত হয় তাৰ বাবেই এই আঁচনি।‘’

মমতা বেনাৰ্জীৰ এই আঁচনিখনত দৰাচলতে কি আছে?

এই আঁচনি অনুসৰি শিক্ষাৰ্থীসকলে ১০লাখ টকা পৰ্যন্ত ঋণ ল’ব পাৰিব।

ষ্টুডেন্ট ক্ৰেডিট কাৰ্ডৰ গেৰেন্টাৰ হ’ব ৰাজ্য চৰকাৰ।

দশম শ্ৰেণীৰ পৰা আৰম্ভ কৰি যিকোনো ধৰণৰ উচ্চশিক্ষা, প্ৰতিযোগিতামূলক পৰীক্ষাৰ প্ৰশিক্ষণ তথা কাৰিকৰী শিক্ষাৰ বাবে ষ্টুডেন্ট ক্ৰেডিট কাৰ্ডত ঋণ দিয়া হ’ব।

শিক্ষাৰ্থীসকলে ৪০ বছৰলৈকে এই ঋণ লাভ কৰিব। ঋণ পৰিশোধ কৰাৰ বাবে সময়সীমা হৈছে ১৫ বছৰ। ইয়াৰ সুত হ’ব মাত্ৰ ৪শতাংশ।

শিক্ষাৰ্থীসকলে একেলগে বা প্ৰয়োজন অনুসৰি সৰ্বাধিক ১০ লাখ টকা ঋণ নিব পাৰিব। পাঠ্যক্ৰমৰ মাছুল, টিউচন মাছুল, কম্পিউটাৰ, লেপটপ ক্ৰয়ৰ বাবেও এই কাৰ্ডত ঋণ দিয়া হ’ব।

ইয়াৰ বাবে  https://www.wb.gov.in/-ৰ পৰ্টেল গৈ ষ্টুডেন্ট ক্ৰেডিট কাৰ্ডৰ লিংকত ক্লিক কৰিব লাগিব। পৰ্টেলত চিধা সোমোৱাৰ বাবে URL হ’ল https://wbscc.wb.gov.in/।

মুখ্যমন্ত্ৰীয়ে লগতে ১০০জন শিক্ষাৰ্থীক আইএএছ তথা আইপিএছৰ প্ৰস্তুতিৰ বাবে নিৰ্বাচিত কৰাৰ কথাও ঘোষণা কৰে। তেওঁলোকে ৰাজ্যচৰকাৰৰ প্ৰতিষ্ঠানৰ পৰা বিনামূলীয়াকৈ শিক্ষা গ্ৰহণ কৰিব পাৰিব আৰু লগতে ষ্টাইপেণ্ডো লাভ কৰিব।

সেইদৰে, ‘সবুজ সাথী’ আঁচনিত আৰু ১২ লাখ শিক্ষাৰ্থীক চাইকেল দিয়াৰ কথাও ঘোষণা কৰিছে মুখ্যমন্ত্ৰী বেনাৰ্জীয়ে।