পাকিস্তানৰ বিধ্বংসী বানৰ পিছতে দেশ খনৰ বিভিন্ন প্ৰান্তত এতিয়া নানান ৰোগে মূৰ দাঙি উঠিছে। স্বাস্থ্য সম্পৰ্কীয় জটিলতাৰ উপৰি মূল্যবৃদ্ধি তথা খাদ্য সামগ্ৰীৰ নাটনিয়েও দেশ খনক জুৰুলা কৰিছে। এনে সময়তে পাক জনতাৰ স্বাস্থ্যকলৈ উদ্বিগ্ন হৈ পৰিছে বিশ্ব স্বাস্থ্য সংস্থা।
শেহতীয়াকৈ বিশ্ব স্বাস্থ্য সংস্থাৰ মুৰব্বী টেড্ৰোছ অধানম ঘেব্ৰেয়েচাছে কৈছে যে পাকিস্তানৰ বান পৰিস্থিতিটোক গ্ৰেড ৩ জৰুৰীকালীন অৱস্থা হিচাপে শ্ৰেণীবদ্ধ ককৰিব পাৰি।তেওঁ কয় “পাকিস্তানত বানপানী, আফ্ৰিকাৰ বৃহত্তৰ এলেকাত খৰাং আৰু দুৰ্ভিক্ষ, আৰু প্ৰশান্ত মহাসাগৰীয় আৰু কেৰিবিয়ান অঞ্চলত সঘনাই হৈ থকা ঘূৰ্ণীবতাহ সকলোৱে জলবায়ু পৰিৱৰ্তনৰ গুৰুতৰ অৱস্থাৰ ইংগিত দিছে,”।
তেওঁ বিশ্ব স্বাস্থ্য সংস্থাই পাকিস্তানক সংকটৰ সময়ত সকলো ধৰণৰ সহায় কৰি যাব বুলিও আশ্বাস দিয়ে। উল্লেখ্য ভাৰতৰ চুবুৰীয়া দেশ পাকিস্তানত শেহতীয়াকৈ হোৱা বানৰ ফলত দেশ খনত কমেও ৩০০০ ৰো অধিক লোকৰ মৃত্যু ঘটিছে। নিহতসকলৰ ভিতৰত কেইবা শতাধিক শিশু থকা বুলি চৰকাৰী সূত্ৰই প্ৰকাশ কৰিছে।
দেশ খনৰ প্ৰায় ভাগ অংশতে হৈ আছে ধাৰাসাৰ বৰষুণ বৰষুণৰ ফলত দেশৰ প্ৰধান প্ৰধান নৈ , উপ-নৈ সমূহ পানীৰে উপচি পৰি বানৰ সৃষ্টি কৰিছে।দেশ খনৰ মাজৰে বৈ যোৱা স্বাত আৰু সিন্ধু নদীৰ পানীয়ে প্লাৱিত কৰে।
জানিব পৰা মতে বানত দেশ খনৰ তিনি কোটিৰো অধিক লোক ক্ষতিগ্ৰস্ত হৈছে । ভয়াৱহ বান পৰিস্থিতিৰ বাবেই পাকিস্তানৰ চৰকাৰে দেশ খনত ৰাষ্ট্ৰীয় জৰুৰীকালীন অৱস্থা ঘোষণা কৰিছে।
বানৰ ফলত দেশ খনৰ প্ৰায় ভাগ ঠাইতে ৰে’ল তথা পথ যাতায়ত বন্ধ হৈ পৰিছে।
খাদ্যৰ সংকটেও দেখা দিছে। দেশ খনত পিঁয়াজৰ মূল্য ৫০০ শতাংশ বৃদ্ধি পাইছে। আলুৰ মূল্য আগৰ তুলনাত চাৰিগুণ বৃদ্ধি পাইছে।
আন পাচলিৰ অৱস্থাও একে। প্ৰলয়ংকৰী বানপানীত বিধ্বস্ত পাকিস্তানত সকলো খাদ্য সামগ্ৰীৰ মূল্য অস্বাভাৱিকভাৱে বৃদ্ধি হ’বলৈ আৰম্ভ কৰিছে। ফলস্বৰূপে, দেশত মূল্যবৃদ্ধি প্ৰায় ৩০ শতাংশ বৃদ্ধি হৈছে। সামগ্ৰিকভাৱে পাকিস্তানৰ সাধাৰণ লোকসকলৰ অৱস্থা এতিয়া অতি বেয়াৰ দিশে ধাবমান হৈছে।
