বিজেপিৰ মন্ত্ৰী বাবে তদন্তৰ আওতালৈ অহা নাই নেকি ৰাজেন গোহাঁই, প্ৰশ্ন নিৰ্য্যাতন বিৰোধী ঐক্যমঞ্চৰ
প্ৰধান মন্ত্ৰী নৰেন্দ্ৰ মোদীৰ ‘বেটী বচাও, বেটী পঢ়াও’ শ্ল’গানৰ বিপৰীতে ধৰ্ষণৰ অভিযোগ উঠাৰ পিছতো ৰাজেন গোহাঁইৰ বিৰুদ্ধে কোনো ব্যৱস্থা নোলোৱা বিজেপিক সমালোচনা কৰি নিৰ্য্যাতন বিৰোধী ঐক্যমঞ্চই শুকুৰবাৰে ৰে’ল ৰাজ্য মন্ত্ৰীজনক তদন্তৰ আওতালৈ অনাৰ দাবী জনাইছে।
‘আৰক্ষীয়ে ৰাজেন গোহাঁইক তদন্তৰ আওতালৈ অনা নাই কিয়? তেওঁ ৰে’ল মন্ত্ৰী, সেইবাবে নে কি,’ আৰক্ষীৰ ভূমিকাক প্ৰশ্ন মঞ্চৰ নেত্ৰী সুমিত্ৰা হাজৰিকাৰ।
ঘটনাটোত গেৰুৱা দলটো যথৰভাৱে নীৰৱ হৈ থকা বুলিও তেওঁ অভিযোগ কৰে।
কোনো নাৰী সংগঠনেই মন্ত্ৰীৰ বিৰুদ্ধে অভিযোগ উত্থাপন কৰা মহিলাগৰাকীৰ বিষয়টো তুলি নাই ধৰা বুলিও অভিযোগ কৰি হাজৰিকাই কয়, ‘মহিলাগৰাকীয়ে নিৰাপত্তাহীনতাত ভুগিছে, কাৰণ তেওঁ অপ্ৰীতিকৰ পৰিস্থিতিৰ আশংকা কৰিছে,’ হাজৰিকাৰ মন্তব্য।
ৰে’ল মন্ত্ৰী গোহাঁইৰ বিৰুদ্ধে নগাঁৱৰ দেউৰী গাঁৱৰ এগৰাকী মহিলাই যোৱা ২ আগষ্টত চাকৰিৰ প্ৰলোভনেৰে ধৰ্ষণ কৰা বুলি অভিযোগ তুলিছিল।
মন্ত্ৰীগৰাকীৰ বিৰুদ্ধে নগাওঁ সদৰ আৰক্ষী থানাত ভাৰতীয় দণ্ডবিধিৰ ৪১৭, ৩৭৬ আৰু ৫০৬ ধাৰাৰ অধীনত ২৫৯২/ ১৮ নং এক গোচৰ ৰুজু কৰিছিল।
কিন্তু পৰৱৰ্তী সময়ত অভিযোগ তোলা মহিলাগৰাকীৰ গিৰীয়েকৰূপে পৰিচয় দিয়া এজন লোকে ‘ভুল বুজাবুজি’ৰ বাবেহে মন্ত্ৰীজনৰ বিৰুদ্ধে গোচৰটো ৰুজু কৰা হ’ল বুলি ফে’ছবুকত ৰাজহুৱা কৰা এটা ভিডিঅ’ৰ পিছতে ঘটনাটোৱে অন্য মোৰ লয়।
প্ৰদেশ কংগ্ৰেছ, এ আই ইউ ডি এফ, কৃষক মুক্তি সংগ্ৰাম সমিতিয়ে মন্ত্ৰীগৰাকীৰ তাৎক্ষণিক পদত্যাগ দাবী কৰিছিল।