ৰাজ্যত বলিছে পঞ্চায়ত নিৰ্বাচনৰ বতাহ। ইয়াৰ বাবে শাসকীয় বিজেপি, অগপ আৰু বিৰোধী কংগ্ৰেছ ব্যস্ত হৈ পৰিছে প্ৰাৰ্থী নিৰ্বাচনত। বিভিন্ন অঞ্চলত প্ৰাৰ্থী কেন্দ্ৰিক সংঘাট সৃষ্টি হৈ থকাৰ সময়তে নলবাৰীত দেখা গ’ল এক বিপৰীত ছবি।
ৰাজনীতিত অসম্ভৱ বুলি একো নাই যদিও জিলাখনৰ বৰক্ষেত্ৰী সমষ্টিৰ বৰভাগত এজন প্ৰাৰ্থীক কেন্দ্ৰ কৰি বৰ্তমান জিলাখনত চলিছে ব্যাপক চৰ্চা। এসময়ৰ আঞ্চলিক দলৰ ভেটি হিচাপে চিহ্নিত বৰক্ষেত্ৰী সমষ্টিৰ বৰভাগ জিলা পৰিষদৰ অগপৰ প্ৰাৰ্থী হিচাপে নিৰ্বাচনত প্ৰতিদ্বন্দ্বিতা আগবঢ়াব এগৰাকী বিজেপি নেতাৰ পত্নীয়ে। প্ৰাৰ্থীগৰাকী হৈছে বিজেপি নেতা অমল নাৰায়ণ পাটোৱাৰীৰ পত্নী ৰুমা পাটোৱাৰী।
উল্লেখযোগ্য যে বিগত বিধানসভা নিৰ্বাচনত বৰক্ষেত্ৰী সমষ্টিত কংগ্ৰেছৰ পৰা টিকট বিচাৰিছিল অমল নাৰায়ণ পাটোৱাৰীয়ে। কিন্তু টিকট নোপোৱাত পাটোৱাৰীয়ে দল ত্যাগ কৰি বিজেপিত যোগদান কৰে। বিজেপিত যোগদান কৰাৰ পাছতো বিশেষ একো সুবিধা লাভ নকৰাত পঞ্চায়ত নিৰ্বাচনৰ আগে আগে নিজৰ পত্নীৰ জৰিয়তে সুবিধা আদায়ৰ চেষ্টাত বিজেপি ত্যাগ কৰি আঞ্চলিক দল অগপত যোগদান কৰিব বুলি ৰাজনৈতিক মহলত চৰ্চিত হৈছে।
উল্লেখ্য যে আগন্তুক পঞ্চায়ত নিৰ্বাচনত অসম গণ পৰিষদে বিজেপিৰ লগত মিত্ৰতা নকৰি অকলে নিৰ্বাচনত প্ৰতিদ্বন্দ্বিতা আগবঢ়াব বুলি কোৱাৰ পাছতো জিলাখনত ঠায়ে ঠায়ে প্ৰাৰ্থীৰ অভাৱ হোৱা হেতুকে এনেদৰে এজন বিজেপি নেতাৰ পত্নীক অগপৰ প্ৰাৰ্থী হিচাপে থিয় কৰোৱাৰ সিদ্ধান্ত লোৱা বুলি এক সূত্ৰৰ পৰা জানিব পৰা গৈছে।
