বোকাখাতত বনৰীয়া হাতীৰ আক্ৰমণত এজন নিহত

বোকাখাতৰ দক্ষিণ সীমাতে থকা কাৰ্বি আংলং জিলাৰ সেউজীয়া পাহাৰ বোৰত হোৱা বনধ্বংস আৰু শিলৰ অবৈধ খননৰ বাবে পাহাৰৰ হাতী এতিয়া খাদ্য আৰু আশ্ৰয় বিচাৰি নামনিলৈ নামি আহিছে ৷

নামনিৰ চাহ বাগিচাবোৰতে দিনৰ ভাগত অনাই বনাই ফুৰা এই হাতীৰ জাকবোৰৰ ওপৰত চলা অমানুষিক অত্যাচাৰৰ বাবে ক্ৰমে যেন হিংস্ৰ হৈ পৰিছে এই অঘৰী হাতীবোৰ ৷ ফলত কাৰ্বি পাহাৰৰ নামনিৰ জনপদ বোৰত বৃদ্ধি পাইছে সংঘাত ৷

বুধবাৰে নিশা কাৰ্বি পাহাৰৰ পৰা নামি অহা এটা হাতীৰ জাকে বোকাখাতৰ কলাখোৱাৰ কেইবাটাও ঘৰৰ ক্ষতি সাধন কৰাৰ লগতে লতাবাৰী চাহ বাগিচাৰ পুৰণা লাইনৰ সমীপত হাতীৰ আক্ৰমণত কুৰ্শ দৰা নামৰ এজন লোক নিহত হয় ৷

লতাবাৰী আমলক্ষী বস্তিৰ বাসিন্দা নিহত কুৰ্শ দৰা নামৰ ব্যক্তিজন নিশাৰ ভাগত কিয় ঘৰৰ পৰা ওলাই আহিছিল জানিব পৰা হোৱা নাই ৷

বহস্পতিবাৰে পুৱা লতাবাৰী চাহ বাগিচাৰ লোকে পুৰণা লাইনৰ সমীপত কুৰ্শ দৰাৰ মৃতদেহটো প্ৰত্যক্ষ কৰি গাঁওৰক্ষী বাহিনীৰ লগতে বোকাখাত আৰক্ষীক খবৰ দিয়ে৷

আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে গোলাঘাটলৈ প্ৰেৰণ কৰে ৷