গোৱালপাৰাত বনৰীয়া হাতীৰ গচকত এজনৰ মৃত্যু; আঘাত নকৰাকৈ এৰি গ’ল নাতিনীয়েকক

গোৱালপাৰা জিলাত আজি পুৱা বনৰীয়া হাতীৰ গচকত এজন ব্যক্তিয়ে মৃত্যুক সাবটিব লগীয়া হয়। নিহত ব্যক্তিজনক মাটিয়াৰ মোনাকচা বকৈটাৰি গাঁৱৰ টিকেন চন্দ্ৰ নাথ বুলি চিনাক্ত কৰা হৈছে।

জানিব পৰা মতে ১৫ মহীয়া নাতিনীয়েকক কোলাত লৈ প্ৰাতঃ ভ্ৰমণৰ বাবে উলাই অহাৰ সময়তে হঠাৎ পিছফালৰ পৰা এটা বনৰীয়া হাতীয়ে আক্ৰমণ কৰাত নাথ পথত বাগৰি পৰাৰ লগতে নাতিনীয়েকো কোলাৰ পৰা উলাই পৰে।

ঘটনাটো দেখা পাই একাংশ স্থানীয় লোকে হৈ-চৈ কৰাত হাতীটোয়ে সেই স্থানৰ পৰিত্যাগ কৰি সমীপৰ হাবীলৈ আঁতৰি যায়।

আনহাতে আচৰিতভাৱে হাতীটোৱে নাথক গচকি থৈ যায় যদিও তেওঁৰ কণমানি নাতিনীয়েকক কোনো ধৰণৰ আঘাত কৰা নাই বুলি প্ৰত্যক্ষদৰ্শীয়ে কয়।

পিছত খবৰ পাই স্থানীয় আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। আনহাতে, বাতৰি যুগুত কৰা সময়লৈকে ঘটনাস্থলীত বন বিভাগৰ কোনো লোক উপস্থিত হোৱা নাছিল।

উল্লেখযোগ্য যে বৃহত্তৰ মাটিয়া অঞ্চলত প্ৰায়ে বনৰীয়া হাতীৰ উপদ্ৰৱ চলি আহিছে। যোৱা কেইটামান বছৰত অঞ্চলটোত বনৰীয়া হাতীৰ আক্ৰমণত ৬ গৰাকীকৈ লোকে প্ৰাণ হেৰুৱাইছে বুলি এগৰাকী স্থানীয় যুৱকে জানিবলৈ দিয়ে।