তামুলপুৰ জিলাৰ ভাৰত ভূটান সীমান্তৰ মহেন্দ্ৰনগৰৰ ১ নং ডোঙাৰ গাঁৱত যোৱা নিশা বন্য হস্তীৰ এটা বিশাল জাকে উপদ্ৰৱ চলায়।
খাদ্যৰ সন্ধানত নিশা মুষলধাৰ বৰষুণৰ মাজতে গাঁওখনত বন্য হস্তীৰ জাক প্ৰৱেশ কৰি ১০ টাকৈ পৰিয়ালৰ ঘৰ-দুৱাৰ ভাঙি তাণ্ডৱৰ সৃষ্টি কৰে।
হাতীৰ জাকটোৱে লগতে ভঁৰালৰ ধান চাউল খাই, তামোল-নাৰিকল গছৰ বাগিছা ভাঙিও বিস্তৰ ক্ষতি সাধন কৰে।
গাঁওখনৰ অতি দৰিদ্ৰ পৰিয়াল সমূহৰ ঘৰ-দুৱাৰ বন্য হস্তীয়ে ভাঙি পেলোৱাত দিশহাৰা হৈ পৰিছে এতিয়া লোক সকল।
অঞ্চলটোৰ বহুকেইটা পৰিয়ালৰ ঘৰৰ লগতে আচবাব সমূহ ভাঙি পেলোৱাত একাংশই আশ্ৰয় লব লগা হৈছে অন্য পৰিয়ালৰ বাসগৃহত।
এই পৰিস্থিতিৰ পাছতো অঞ্চলটোত বন বিভাগ তথা প্ৰশাসনৰ লোকে খবৰ নোলোৱাৰ বাবে ক্ষোভ প্ৰকাশ কৰিছে স্থানীয় ৰাইজে।
নাগ্ৰীজুলি আঞ্চলিক বঙালী যুৱ ছাত্ৰ ফেডাৰেচনৰ সম্পাদক মিথুন দাসে অনতি পলমে পৰিস্থিতিৰ বুজ লোৱাৰ বাবে স্থানীয় প্ৰশাসনক গাঁৱত উপস্থিত হ’বলৈ দাবী জনাইছে।
