পুৰণিগুদামৰ জলাহত পুৱতি নিশা বন্যহস্তীৰ তাণ্ডৱ, ক্ষতিগ্ৰস্ত গৃহ তথা যানবাহন
নগাঁৱৰ বিভিন্ন স্থানত সম্প্ৰতি হাতী-মানুহৰ সংঘাতে লৈছে এক ভয়ংকৰ ৰূপ। বিভিন্ন সময়ত বন্যহস্তীয়ে বিভিন্ন স্থানত সন্ত্ৰাস চলোৱাৰ সমান্তৰালভাৱে শনিবাৰে পুৱতি নিশাও নগাঁৱৰ পুৰণিগুদামৰ জলাহ গাঁৱত বন্যহস্তীয়ে চলালে তীব্ৰ সন্ত্ৰাস।
তিনিটা বন্যহস্তীৰ এটা দলে এফালৰ পৰা ভাঙি নিঃশেষ কৰিলে স্থানীয় দিব্যজ্যোতি শইকীয়া আৰু বিনোদ শইকীয়া নামৰ লোক দুজনৰ ভৰাঁলগৃহ সহ গাড়ী থোৱা ঘৰ।
বন্যহস্তীৰ দলটোৱে লগতে ৰাণাজ্যোতি শইকীয়া নামৰ আন এজন লোকৰ এখন মটৰ চাইকেলৰো ক্ষতিসাধন কৰে।
আনহাতে, বন্যহস্তীৰ জাকটোৰ আক্ৰমণৰ পৰা এজন স্থানীয় সাংবাদিক নয়নমনি বৰাৰ লগতে এটি কণমানি শিশু সহ কেইবাজনো লোকৰ কথমপি প্ৰাণ ৰক্ষা পৰে।
উল্লেখ্য যে, দেওবাৰে পুৱা পৰ্য্যন্ত চলা বন্যহস্তীৰ সন্ত্ৰাসৰ ফলত আতংকিত হৈ পৰে স্থানীয় ৰাইজ। ইপিনে, নিশাই বন বিভাগৰ লোক ঘটনাস্থলীত উপস্থিত হৈ হাতীকেইটা খেদাৰ চেষ্টা কৰে যদিও ব্যৰ্থ হয় বন বিভাগৰ দলটো।
বৰ্তমানেও নিশা সন্ত্ৰাস চলোৱা বন্যহস্তী তিনিটাই গাৱঁখনৰ কাষৰে এখন হাবিত অৱস্থান কৰাক কেন্দ্ৰ কৰি সমগ্ৰ অঞ্চলটোত আতংকই বিৰাজ কৰিছে।