ৰাজ্যৰ বিভিন্ন জিলাত বিগত দুই-তিনিদিনত হৈ থকা বতাহ-ধুমুহাই বহু লোকক গৃহহাৰা কৰাৰ সময়তে গুৱাহাটী বৰঝাৰস্থিত আঞ্চলিক বতৰ বিজ্ঞান কেন্দ্ৰই অন্য এক আগজাননী দিছে।
উল্লেখযোগ্য যে ভাৰতীয় বতৰ বিজ্ঞান কেন্দ্ৰই দক্ষিণ ভাৰতৰ ৰাজ্যসমূহত ঘূৰ্ণীবতাহৰ বাবে এলাৰ্ট জাৰি কৰিছিল। শ্ৰীলংকাৰ দক্ষিণ দিশত উৎপত্তি হোৱা ফেণী ঘূৰ্ণিবতাহৰ প্ৰভাৱ বৰ্তমান উত্তৰপূৰ্বাঞ্চলত নপৰে যদিও বতাহৰ গতি সলনি হ’লে পৰৱৰ্তী সময়ত কিছু পৰিমাণে প্ৰভাৱ পৰাৰ সম্ভাৱনা আছে।
অহা ২ মে’লৈকে অসমৰ কিছু কিছু ঠাইত ধাৰাসাৰ বৰষুণৰ সম্ভাৱনা থকাৰ লগতে গুৱাহাটী মহানগৰীতো বৰষুণৰ লগতে আকাশ ডাৱৰীয়া হৈ থাকিব বুলি বৰঝাৰস্থিত আঞ্চলিক বতৰ বিজ্ঞান কেন্দ্ৰই আগজাননী দিছে।
ইফালে এ এন আইৰ মতে ১ মে’লৈকে উত্তৰ-পশ্চিম দিশত ফেণী ঘূৰ্ণিবতাহ আবাঢ়ি যোৱাৰ লগতে লাহে লাহে এই ফেণী ঘূৰ্ণিবতাহৰ প্ৰভাৱ উত্তৰ-পূৰ্বৰ দিশলৈকো পৰাৰ সম্ভাৱনা আছে।
