শেহতীয়াকৈ চলি থকা জল্পনা-কল্পনাৰ অন্ত পেলাই তেলেংগানা ৰাষ্ট্ৰ সমিতিৰ মুৰব্বী তথা তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে আজি শীঘ্ৰেই এটা ৰাষ্ট্ৰীয় দল আৰম্ভ কৰিব বুলি ঘোষণা কৰিছে।
বিজেপি বিৰোধী গোটৰ এগৰাকী অন্যতম শক্তিশালী নেতা হিচাপে শেহতীয়াকৈ নিজকে প্ৰতিষ্ঠা কৰা ৰাৱে নতুন দল গঠনৰ বাবে নীতি প্ৰস্তুতিৰ কাম ইতিমধ্যে চলি আছে বুলি সদৰী কৰিছে।
আজি এক বিবৃতিত ৰাৱে কয় যে তেলেংগানা আন্দোলন আৰম্ভ হোৱাৰ পূৰ্বে যিদৰে বুদ্ধিজীৱী, অৰ্থনীতিবিদ আৰু বিভিন্ন ক্ষেত্ৰৰ বিশেষজ্ঞসকলৰ সৈতে আলোচনা হৈছিল, সেই একেদৰেই দীঘলীয়া আলোচনাৰ পিছত বৈকল্পিক ৰাষ্ট্ৰীয় কাৰ্যসূচীৰ ওপৰত ঐক্যমত গঠন হৈছে।
অতি সোনকালেই এটা ৰাষ্ট্ৰীয় দল গঠন কৰা হ’ব আৰু ইয়াৰ নীতি নিৰ্ধাৰণ কৰা হ’ব বুলিও বিবৃতিটোত লগতে উল্লেখ কৰা হৈছে।
প্ৰকাশিত খবৰ অনুসৰি ২৬ ছেপ্টেম্বৰৰ পৰা আৰম্ভ হ’বলগীয়া ১০ দিনীয়া দশৰা উৎসৱৰ সময়তে বিৰোধী নেতাগৰাকীয়ে নতুন ৰাষ্ট্ৰীয় দলটোৰ বিষয়ে আনুষ্ঠানিক ঘোষণা কৰাৰ সম্ভাৱনা আছে।
উল্লেখ্য যে বিগত কেইটামান বছৰত ৰাৱে বিজেপি চৰকাৰৰ বিৰুদ্ধে আক্ৰমণাত্মক স্থিতি গ্ৰহণ কৰি আহিছে। দেশৰ ৰাজনীতিত বিজেপিৰ গতি ৰোধ কৰাৰ উদ্দেশ্যে ৰাৱে বিৰোধীৰ এক ঐক্যমঞ্চ গঠনৰ বাবেও প্ৰচেষ্টা চলাইছিল।
ইফালে কেইদিনমান পূৰ্বে তৃণমূ মুৰব্বী তথা বংগৰ মুখ্যমন্ত্ৰী মমতা বেনাৰ্জীয়েও ৰাও আৰু নীতিশ কুমাৰৰ সৈতে নতুন ৰাজনৈতিক সমীকৰণৰ প্ৰস্তুতিৰ ইঙ্গিত দিছিল।
