হাইলাকান্দি জিলাত প্ৰতিষ্ঠানিক কোৱাৰেণ্টাইনত থকা এগৰাকী ৩২ বছৰীয়া মহিলাই সোমবাৰে আত্মহত্যা কৰে।
বাংগালুৰুৰ পৰা উভতি অহাৰ পাছৰে পৰা মহিলা গৰাকীয়ে পৰিয়ালৰ লোকৰ সৈতে কোৱাৰেণ্টাইনত আছিল।
আৰক্ষীয়ে জানিব দিয়া মতে, মহিলা গৰাকীৰ স্বামীৰ ক’ৰ’নাৰ পৰীক্ষাৰ ফলাফল অহাত পলম হোৱা বাবেই মহিলা গৰাকীয়ে আত্মহত্যাৰ পথ বাচি লোৱা বুলি সন্দেহ প্ৰকাশ কৰা হৈছে।
হালিকান্দিৰ এখন চৰকাৰী বিদ্যালয়ত কোৱাৰেণ্টাইন হৈ থকা মহিলা গৰাকীয়ে বিদ্যালয়খনৰে গা ধোৱা ঘৰত চিপ লৈ ওলমি থকা অৱস্থাত উদ্ধাৰ হয়।
মহিলা গৰাকী তেওঁৰ স্বামী আৰু তেওঁলোকৰ আঠবছৰীয়া পুত্ৰই বিগত ২৮ জুনত বাংগালুৰুৰ পৰা বিমানযোগে অসমলৈ উভতি আহিছিল।
অসমলৈ উভতি অহাৰ পাছতে মহিলা গৰাকী আৰু তেওঁৰ স্বামী আৰু পুত্ৰৰ স্বোৱাৰ সংগ্ৰহ কৰি স্বাস্থ্য বিষয়া সকলে গুৱাহাটী চিকিৎসা মহাবিদ্যালয় হাস্পাতাললৈ পৰীক্ষাৰ বাবে প্ৰেৰণ কৰিছিল বুলি আৰক্ষীয়ে কয়।
উল্লেখযোগ্য যে, অসমত ক’ৰ’না ভাইৰাছৰ সংক্ৰমণে গুৰুতৰ ৰূপ ধাৰণ কৰিছে। ১৩ জুলাইত ৰাজ্যত মাত্ৰ ২৪ ঘণ্টাৰ ভিতৰতে ১০০১ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰিছিল।
