গুজৰাটৰ মৰ্বি চহৰত সংঘটিত হৈছে এক জঘন্য ঘটনা। ২১ বছৰীয়া এজন দলিত যুৱকক অকথ্য নিৰ্যাতন চলোৱাৰ অভিযোগত আৰক্ষীয়ে এগৰাকী মহিলা ব্যৱসায়ীসহ ছয়গৰাকীৰ বিৰুদ্ধে ৰুজু কৰিছে গোচৰ। অভিযোগ অনুসৰি, দৰমহা বিচৰাৰ বাবেই যুৱকজন সন্মুখীন হয় নিৰ্যাতনৰ।
মহিলাগৰাকীৰ প্ৰতিষ্ঠানটোত কাম কৰা যুৱকজনে পোন্ধৰদিনৰ প্ৰাপ্য দৰমহা বিচৰাৰ বাবেই মহিলাগৰাকীয়ে জোতা মুখত সুমুৱাই দি ক্ষমা খুজিবলৈ বাধ্য কৰা বুলি অভিযোগ উত্থাপন হৈছে। এই সন্দৰ্ভত নীলেশ দলছানিয়া নামৰ দলিত যুৱকজনে ইতিমধ্যে এজাহাৰ দাখিল কৰিছে।
প্ৰকাশিত খবৰ অনুসৰি, ৰাভাপাৰ ক্ৰছৰোডৰ এটা বাণিজ্যিক কমপ্লেক্সত থকা ৰানিবা ইণ্ডাষ্ট্ৰীজ প্ৰাইভেট লিমিটেড নামৰ প্ৰতিষ্ঠানটোত অক্টোবৰৰ আৰম্ভণিতে টাইলছ মাৰ্কেটিঙত জড়িত দলছানিয়াক মাহিলী ১২ হাজাৰ টকাৰ দৰমহাত নিযুক্তি দিয়া হৈছিল।
কিন্তু ১৮ অক্টোবৰত হঠাতে তেওঁক বৰ্খাস্ত কৰে। ইয়াৰ পিছতে দলছানিয়াই কোম্পানীত কাম কৰা ১৬ দিনৰ দৰমহা বিচাৰে যদিও কোম্পানীৰ স্বত্বাধিকাৰী বিভূতি পেটেল ওৰফে ৰাণিবাই কোনো স্পষ্ট উত্তৰ দিয়াৰ পৰা বিৰত থাকে আৰু তাৰ পিছত যুৱকজনে ফোন কৰিলেও কোনো সঁহাৰি দিয়া বন্ধ কৰে।
এনে পৰিস্থিতিত যোৱা বুধবাৰে সন্ধিয়া দলছানিয়া, ভাতৃ মেহুল আৰু আন এজন যুৱক প্ৰাপ্য ধন সংগ্ৰহৰ বাবে কাৰ্যালয়লৈ যোৱাৰ সময়তে ব্যৱসায়ীগৰাকীৰ ভাতৃয়ে আন কিছু সহযোগীৰ সৈতে তিনিওকে আক্ৰমণ কৰে। আনহাতে স্বত্বাধিকাৰী বিভূতি পেটেলেও যুৱকজনক চৰ সোধাই বাহিৰলৈ টানি লৈ যায়।
ছয়-সাতজন লোকে এইদৰে তিনিওকে মাৰপিট কৰাৰ পিছতে বিভুতি পেটেলে তেওঁৰ জোতা দলছানিয়াৰ মুখত ল’বলৈ বাধ্য কৰাইছিল আৰু তেওঁক দৰমহা বিচৰাৰ বাবে ক্ষমা খুজিবলৈ বাধ্য কৰাইছিল বুলি অভিযোগ কৰিছে যুৱকজনে। লগতে উক্ত এলেকাত পুনৰ দেখা পালে তেওঁক হত্যা কৰাৰো ভাবুকি দিয়ে।
এনে অকথ্য নিৰ্যাতনৰ পিছত আনকি এটা ভিডিঅ’ শ্বুট কৰি দলছানিয়াক জোৰকৈ তেওঁ বিভূতীৰ কাৰ্যালয়লৈ ধন দাবী কৰিবলৈ আহিছিল বুলি ক’বলৈ বাধ্য কৰাইছিল বুলিও অভিযোগ উত্থাপন হৈছে। এনে আতিশয্যৰ পিছত যুৱককেইজনক তাৰ পৰা খেদি পঠিওৱা হয়।
ইফালে ঘৰলৈ উভতি অহাৰ পিছতে যুৱকজনক মৰ্বি অসামৰিক চিকিৎসালয়লৈ লৈ যোৱা হয়। বৰ্তমান তেওঁ চিকিৎসাধীন হৈ আছে বুলি আৰক্ষীয়ে জানিবলৈ দিয়ে। যুৱকজনৰ অভিযোগৰ ভিত্তিত বৃহস্পতিবাৰে আৰক্ষীয়ে বিভূতি পেটেল, তেওঁৰ ভাতৃ ওম পেটেল আৰু আন লোককেইজনৰ বিৰুদ্ধে গোচৰ ৰুজু কৰে।
এই গোচৰৰ তদন্ত অব্যাহত আছে বুলি উল্লেখ কৰি স্থানীয় এগৰাকী উচ্চপদস্থ আৰক্ষী বিষয়াই অৱশ্যে গোচৰ সন্দৰ্ভত এইপৰ্যন্ত কোনো লোককে গ্ৰেপ্তাৰ কৰা হোৱা নাই বুলি সদৰী কৰে।
