শুৱালকুছিৰ ব্ৰহ্মপুত্ৰৰ ৰাজঘাটত চাঞ্চল্য।
চালক বিহীন যন্ত্ৰচালিত নাওত মুমূৰ্ষ অৱস্থাত উদ্ধাৰ হৈছে এগৰাকী মহিলা।
ঘটনাক কেন্দ্ৰ কৰি তীব্ৰ চাঞ্চল্যৰ সৃষ্টি হৈছে শুৱালকুছিত। আজি পুৱাই ব্ৰহ্মপুত্ৰৰ ৰাজঘাটেৰে ভাঁহি অহা এখন যন্ত্ৰ চালিত নাও খনত নাছিল কোনো চালক। স্থানীয় নাৱৰীয়াই চালক বিহীন নাও খন প্ৰত্যক্ষ কৰি আৰক্ষীক খবৰ দিয়ে।
তাতকৈ ডাঙৰ কথাটো হল চালক বিহীন ভটভটি নাওৰ ভিতৰত মুমূৰ্ষ অৱস্থাত পৰি আছিল এগৰাকী মহিলা। ঘটনা সন্দৰ্ভত তৎক্ষণাত খবৰ দিয়া হল শুৱালকুছি নদী আৰক্ষীক। শুৱালকুছি নদী আৰক্ষীয়ে উদ্ধাৰ কৰে চালক বিহীন নাও খনৰ লগতে মহিলা গৰাকীক।
নদী আৰক্ষীৰ অনুসন্ধানত পোহৰলৈ আহিল যে যন্ত্ৰ চালিত নাও খন পাণ্ডু নদী আৰক্ষীৰ।
চালক অবিহনে কেনেকৈ মহিলা গৰাকীৰ সৈতে ব্ৰহ্মপুত্ৰৰ বুকুয়েদি নদী আৰক্ষীৰ যন্ত্ৰ চালিত নাওখনে শুৱালকুছি পালে তাকে লৈ প্ৰশ্নৰ সৃষ্টি হৈছে।
মহিলা গৰাকী জাগীৰোডৰ মনোমাই ডেকা বুলি আৰক্ষীয়ে সদৰী কৰিছে। মহিলা গৰাকীক শুৱালকুছি এফআৰইউত চিকিৎসা কৰাৰ পিছত উন্নত চিকিৎসাৰ বাবে গুৱাহাটী চিকিৎসা মহাবিদ্যালয় চিকিৎসালয়লৈ প্ৰেৰণ কৰা হয়।
এই ঘটনাক সহজ ভাবে লব পৰা নাই স্থানীয় লোকে।
