উত্তৰ পূৱ সীমান্ত ৰে’লৱেৰ নিউ বঙাইগাঁও ৰে’লৱে জংচনত ৰে’লৰ ডবাৰ ভিতৰতে এগৰাকী মহিলাই সন্তান প্ৰসৱ কৰিছে ৷
তিনিচুকীয়াৰ পৰা নিউ দিল্লী অভিমুখী নামনিমুৱা ১৫৯০৯ নম্বৰৰ অৱধ আছাম এক্সপ্ৰেছৰ এচ – ২ ডবাৰ ভিতৰত ৰীণা কুমাৰী (২৬) নামৰ প্ৰসূতিয়ে প্ৰসৱ কৰে সন্তানটি ৷
উল্লেখ্য যে নামনিমুৱা অৱধ আছাম এক্সপ্ৰেছত তিনিচুকীয়াৰ পৰা বিহাৰৰ মুজাফফৰপুৰ লৈ গৈ আছিল মহিলা গৰাকী৷
কিন্তু ৰে’লৰ ডবাৰ ভিতৰত যাত্ৰা কৰি থকাৰ সময়তে মহিলা গৰাকীৰ প্ৰসৱ বেদনা ক্ৰমশ বৃদ্ধি পায়৷
স্পৰ্শকাতৰ বিষয়টো সম্পৰ্কত ৰে’ল বিভাগৰ লোক অৱগত হয় আৰু বিষয়টো লগে লগে নিউ বঙাইগাঁও ৰে’লৱে হাস্পতাল কৰ্তৃপক্ষক জনাই দিয়া হয় ৷
খবৰটো পোৱাৰ পিছতে নিউ বঙাইগাঁও ৰে’লৱে হাস্পতালৰ কৰ্তব্যৰত চিকিৎসক ডা:মোজাম্মিল হুছেইন আৰু নাৰ্ছিং ষ্টাফ গোপাল পাল ৰে’লখন আহি পোৱাৰ পূৰ্বৰে পৰা সাজু হৈ থাকে নিউ বঙাইগাঁও ৰে’ল জংচনত ৷
নিউ বঙাইগাঁও ৰে’লৱে হাস্পতালৰ কৰ্তব্যৰত চিকিৎসক ডা:মোজাম্মিলৰ হুছেইনৰ পৰা জানিব পৰা মতে প্ৰসৱ বেদনাত ছটফটাই থকা ৰীণা কুমাৰীক হাস্পতালত ভৰ্তি হ’বলৈ আহ্বান জনোৱা হৈছিল যদিও হাস্পতালত ভৰ্তি হ’বলৈ অস্বীকাৰ কৰে৷
পৰৱৰ্তী সময়ত চিকিৎসক আৰু নাৰ্ছিং ষ্টাফ সকলৰ প্ৰচেষ্টাত ৰে’লৰ ডবাৰ ভিতৰতে মহিলা গৰাকীৰ প্ৰসৱ কৰোৱাই সুস্থ মহিলা সন্তান জন্ম দিয়াবলৈ সক্ষম হয় ৷
স্মৰ্তব্য পৰৱৰ্তীকালত নিউ বঙাইগাঁও ৰে’লৱে হাস্পতালৰ পৰা প্ৰসূতি গৰাকীক অত্যৱশ্যকীয় ঔষধ পাতি যোগান ধৰি যাবলৈ দিয়ে ৷ ভাৰতীয় ৰে’লৱে বিভাগৰ লগতে কৰ্তব্যৰত চিকিৎসক আৰু নাৰ্ছিং কৰ্মচাৰী সকলৰ এনে প্ৰচেষ্টাক ভূয়সী প্ৰশংসা কৰিছে যাত্ৰীসকলে ৷
