শ্ৰমিকৰ প্ৰাপ্য মজুৰীৰ দাবীত বোকাখাতৰ মেথনি চাহ বাগিচাত আজি এক উত্তপ্ত পৰিস্থিতিৰ সৃষ্টি হয়। শ্ৰমিকৰ ন্যায্য প্ৰাপ্তিৰ দাবীত বাগিচাখনৰ শ্ৰমিকে আহি ঘেৰাও কৰে পৰিচালকৰ কাৰ্য্যালয়।
দীৰ্ঘ সময় ধৰি মেথনি চাহ বাগিচাৰ শ্ৰমিকসকলে নিজৰ প্ৰাপ্য মজুৰি সময় মতে নোপোৱাৰ উপৰিও বাগিচা শ্ৰম আইন মতে পাব লগা বিভিন্ন সা সুবিধাৰ পৰা বঞ্চিত হোৱাৰ অভিযোগ তুলি পৰিচালকৰ কাৰ্যালয় ঘেৰাও কৰি পৰিৱেশ উত্তাল কৰি তোলে।
পৰিস্থিতি কিছু পৰিমানে উত্তপ্ত হৈ পৰাত বোকাখাতৰ মহকুমা প্ৰশাসনে ঘটনাস্থলীত আৰক্ষী মোতায়েন কৰিবলৈ বাধ্য হয়। পৰিস্থিতি নিয়ন্ত্ৰণৰ বাবে ঘটনাস্থলীত মহকুমা দণ্ডাধীশ মানস জ্যোতি নাথ উপস্থিত হয়।
শ্ৰমিকসকলে জনোৱা মতে বাগিচাখনৰ পৰিচালকজনে দীৰ্ঘদিন ধৰি শ্ৰমিকসকলৰ ওপৰত হিটলাৰী শাসন চলাই অহাৰ লগতে বিভিন্ন উজুহাতত তেওঁলোকক প্রাপ্য মজুৰি আৰু বাগিচা শ্ৰম আইন মতে পাব লগা সা-সুবিধাৰ পৰাও বঞ্চিত কৰি আহিছে।
ইয়াৰ প্ৰতিবাদত বাগিচাৰ শ্ৰমিকসকলে পৰিচালকজনৰ কাৰ্যালয় ঘেৰাও কৰি নায্য প্ৰাপ্তিৰ দাবী জনায়।
পৰৱৰ্তী সময়ত মহকুমা দণ্ডাধীশৰ উপস্থিতিত অহা ১৫ জুনত বাগিচাৰ শ্ৰমিক সংগঠন, চাহ জনজাতি ছাত্ৰ সন্থাৰ লগতে বিভিন্ন দল সংগঠনৰ উপস্থিতিত বোকাখাতৰ মহকুমাধিপতিৰ কাৰ্যালয়ত বাগিচাৰ কৰ্তৃপক্ষৰ এক আলোচনা অনুষ্ঠিত কৰাৰ সিধান্তৰে আজি পৰিচালকৰ কাৰ্যালয় ঘেৰাও কাৰ্যসূচী বাতিল কৰা হয় ৷
