সমগ্ৰ বিশ্বৰ বিভিন্ন ৰাষ্ট্ৰৰ লগতে বুধবাৰে কাজিৰঙাতো বিশ্ব বন্যপ্ৰাণী দিৱস উদযাপিত হয়৷
কাজিৰঙা ৰাষ্ট্ৰীয় উদ্যান কৰ্তৃপক্ষ আৰু ৰাষ্ট্ৰীয় উদ্যানত কৰ্মৰত বিভিন্ন প্ৰকৃতি সংগঠনৰ সহযোগত বুধবাৰে বৰজুৰিত থকা বন্যপ্ৰাণী পুনৰসংস্থাপন আৰু সংৰক্ষণ কেন্দ্ৰত বিশ্ব বন্যপ্ৰাণী দিৱসৰ বিশেষ অনুষ্ঠান অনুষ্ঠিত হয়৷
অনুষ্ঠানত বোকাখাতৰ জেডিএছ জি মহাবিদ্যালয় আৰু চিএন বি মহাবিদ্যালয়ৰ উপৰিও কাষৰীয় বিদ্যালয়সমূহৰ ছাত্ৰ-ছাত্ৰীয়ে অংশ গ্ৰহণ কৰে৷
অনুষ্ঠানত পূৱ অসম বন্যপ্ৰাণী সংমণ্ডলৰ ডিএফঅ’ ৰমেশ কুমাৰ গগৈ, বিশ্বনাথ বন সংমণ্ডলৰ ডিএফঅ’ মুকুট চন্দ্ৰ দাস, ৱাইল্ড লাইফ ট্ৰাষ্ট অৱ ইণ্ডিয়াৰ উপ সঞ্চালক ড৹ ৰথীন বৰ্মন, সহকাৰী বন সংৰক্ষক ঋতুপৱন বৰা, অইল ইণ্ডিয়াৰ প্ৰৱন্ধক দিগন্ত ঠাকুৰীয়া, বন্যপ্ৰাণী পুনৰসংস্থাপন আৰু সংৰক্ষন কেন্দ্ৰৰ পৰিচালক ডা৹ ভাস্কৰ চৌধুৰী, পশু চিকিৎসক ডা৹ চামচুল আলী, বনাঞ্চলিক বিষয়া ক্ৰমে প্ৰদীপ কুমাৰ গোস্বামী, বিবিত দিহিঙীয়া আৰু ডা৹ ইন্দ্ৰানী বৰগোহাঁই উপস্থিত থাকি বন আৰু মানুহৰ বহনশীল কাৰ্যৱলী পটভূমিত বিশ্ব শীৰ্ষক বক্তব্য আগবঢ়ায়৷
অনাৰেৰী ৱাইল্ড লাইফ ৱাৰ্ডেন উত্তম শইকীয়াই আঁত ধৰা অনুষ্ঠানত পশু চিকিৎসক ডা৹ চামচুল আলীয়ে বন্যপ্ৰাণী সংৰক্ষণৰ বাবে বন্যপ্ৰাণী পুনৰসংস্থাপন আৰু সংৰক্ষণ কেন্দ্ৰই কৰি অহা কাৰ্যাৱলীৰ বিষয়ে ছাত্ৰ-ছাত্ৰীক সচিত্ৰ উপস্থাপনেৰে বৰ্ণনা কৰে৷
ছাত্ৰ-ছাত্ৰীৰ হৈ ৰৌচন গৌতম, ক্ষীৰোদ শইকীয়া, নয়নজ্যোতি লইঙে বনপ্ৰাণী সংৰক্ষণ আৰু কাজিৰঙাৰ প্ৰতি থকা দায়ৱদ্ধতাৰে বক্তব্য আগবঢ়ায়৷
অনুষ্ঠানতে কাজিৰঙা ৰাষ্ট্ৰীয় উদ্যানত হৈ যোৱা আৰ্দ্ৰভুমিৰ পক্ষী গণনাত অংশগ্ৰহণ কৰা স্বেচ্ছাসেৱকসকলক মানপত্ৰ প্ৰদান কৰা হয়৷
