প্ৰকৃতিৰ মহিমা বুজা সঁচাকৈয়ে টান।
বিশ্বৰ আটাইতকৈ উষ্ণ মৰুভূমি হিচাবে পৰিচিত চাহাৰাত এতিয়া কাশ্মীৰ সদৃষ পৰিবেশে বিৰাজ কৰিছে। মৰুভূমি খনৰ চৌদিশে এতিয়া কেৱল বৰফ আৰু বৰফ।
যদিও জানুৱাৰী মাহত পৃথিৱীৰ বহু ঠাইত বৰফ আৰু ঠাণ্ডা পৰে, তথাপি বৰফ পৰা গৰম মৰুভূমিৰ কথা বিশেষ শুনা নাযায়। কিন্তু উদ্ভট যেন লাগিলেও এতিয়া চাহাৰা মৰুভূমিত ঘটা ঘটনাই সকলোকে আচৰিত কৰি তুলিছে।
শেহতীয়াকৈ চাহাৰা মৰুভূমিৰ বহু অংশত আশ্চৰ্যজনকভাৱে বৰফ পৰিছে। বৰফৰ আস্তৰণে ঢাকি পেলাইছে মৰুভূমি খনৰ গৰম বালি।
ফটোগ্ৰাফাৰ কৰিম বৌচেট্টাই বালিৰে আৱৰি থকা মৰুভূমি খনত বৰফৰ অবিশ্বাস্য ফটো তুলিছে।
চাহাৰা মৰুভূমিয়ে উত্তৰ আফ্ৰিকাৰ বেছিভাগ অংশ সামৰি লৈছে আৰু মৰুভূমি খনে লাখ লাখ বছৰ ধৰি নানান প্ৰাকৃতিক পৰিৱৰ্তনৰ সাক্ষী হৈ ৰৈছে।
চলিত মাহত বৰফৰ স্ফটিকে চাহাৰাৰ বালিৰ টিলাবোৰ আৱৰি ধৰা দৃশ্যই সকলোকে আচৰিত কৰি তুলিছে।
১৯৭৯, ২০১৬, ২০১৮ আৰু ২০২১ চনত চাহাৰা মৰুভূমিত হোৱা তুষাৰপাতে বতৰৰ পৰিৱৰ্তনৰ ভয়াৱহ পৰিণতিকে সোঁৱৰাই দিছে বুলি বিজ্ঞানীসকলে মন্তব্য কৰিছে।
২০১৬ চনত ১মিটাৰ ডাঠকৈ চাহাৰাত বৰফ পৰিছিল।
উল্লেখ্য বিজ্ঞানীসকলে কৈ আহিছে যে ১৫,০০০ বছৰৰ ভিতৰত চাহাৰা পুনৰ সেউজীয়া হ’ব পাৰে। পূৰ্বেও চাহাৰা সেউজীয়া অঞ্চলেই আছিল বুলি বিজ্ঞানীসকলে প্ৰমাণ পাইছে।
