বড়ো, অসমীয়া ভাষাত কেইবাখনো পুথি লিখি অসমীয়া ভাষা-সাহিত্যৰ ভড়াল চহকী কৰা বিশিষ্ট সাহিত্যিক অৰুণ কুমাৰ বৰগয়াৰীৰ আজি ৮৩ বছৰ বয়সত পৰলোকপ্ৰাপ্তি ঘটে।
অৰুণ কুমাৰ বৰগয়াৰীয়ে অসম সাহিত্য সভাৰ কোকৰাঝাৰ জিলাৰ প্ৰাক্তন সভাপতি আৰু অসম সাহিত্য সভাৰ প্ৰাক্তন কাৰ্য্যনিৰ্বাহক হিচাপে কাৰ্য্যনিৰ্বাহ কৰিছিল।
মৃত্যুৰ পূৰ্বে বৰগয়াৰীয়ে ইহঃসংসাৰত এগৰাকী কন্যা আৰু পুত্ৰ এৰি থৈ যায়।
বিশিষ্ট সাহিত্যিক, বুদ্ধীজীৱী অৰুণ বৰগয়াৰীৰ পৰলোকপ্ৰাপ্তিত মুখ্য মন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে।
আজি এক বিবৃতিযোগে মুখ্য মন্ত্ৰী সোণোৱালে জীৱনকালত একান্ত নিষ্ঠা আৰু ঐকান্তিকতাৰে প্ৰয়াত অৰুণ বৰগয়াৰীয়ে ৰাজ্যখনৰ সাহিত্য জগতলৈ যি বলিষ্ঠ অৰিহণা আগবঢ়াই গৈছে সেয়া জনসাধাৰণে সদায় শ্ৰদ্ধাৰে স্মৰণ কৰিব বুলি উল্লেখ কৰে।
বড়ো আৰু অসমীয়া ভাষাত সাহিত্য চৰ্চ্চাৰ জৰিয়তে অসমৰ সাহিত্যৰ ক্ষেত্ৰখনলৈ তেখেতে অনন্য বৰঙনি আগবঢ়াই গৈছে। অসমৰ সাহিত্য ক্ষেত্ৰখনক শক্তিশালী কৰাৰ বাবেও তেওঁ দৃঢ়তাৰে প্ৰয়াস চলাই গৈছিল লগতে ৰাজ্যখনৰ বিভিন্ন ভাষা-সাহিত্য আৰু কলা-সংস্কৃতিৰ সংৱৰ্দ্ধনৰ বাবেও তেওঁ নিৰলসভাৱে কাম কৰি গৈছিল বুলিও মুখ্য মন্ত্ৰীয়ে লগতে কয়।
মুখ্য মন্ত্ৰীয়ে প্ৰয়াত অৰুণ বৰগয়াৰীৰ বিদেহী আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনোৱাৰ উপৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।
মুখ্য মন্ত্ৰীৰ লগতে অসমৰ বিভিন্ন দল-সংগঠনেও বিশিষ্ট সাহিত্যিক গৰাকীৰ মৃত্যুৰ গভীৰ শোক ব্যক্ত কৰিছে।
