এগজিট প’লৰ মতে হাৰিয়ানাত সুকলমে চৰকাৰ গঠন কৰিব কংগ্ৰেছে।বহুতৰে ভৱিষ্যতবাণী আছিল যে কংগ্ৰেছ শিবিৰে ৬৪খন আসন পৰ্যন্ত লাভ কৰিব। নিৰ্বাচনৰ পাছত সাতটা বুথ ৰিটাৰ্ণ সমীক্ষাত এই দাবী কৰা হৈছিল। কিন্তু ভোটগণনা আৰম্ভ হোৱাৰ লগে লগে এগজিট প’ল ভুল বুলি প্ৰমাণিত হ’ল। কংগ্ৰেছক এৰি বহু দূৰ আগবাঢ়িছে বিজেপিয়ে। শেহতীয়া খবৰ অনুসৰি ৫০খন আসনত আগবাঢ়ি আছে গেৰুৱা শিবিৰ। আনহাতে ৩৫খন আসনত আগবাঢ়ি আছে কংগ্ৰেছ।
৪ অক্টোবৰত হাৰিয়ানাৰ ৯০টা বিধানসভা সমষ্টিত এক পৰ্যায়ৰ নিৰ্বাচন অনুষ্ঠিত হৈছিল। ইয়াৰ পিছত ইটোৰ পিছত সিটোকৈ এক্সিট প’ল প্ৰকাশ পালে। হাৰিয়ানাত কংগ্ৰেছে অকলে চৰকাৰ গঠন কৰিবলৈ ওলাইছে বুলি দাবী কৰা হৈছে। ৭ বুথ ৰিটাৰ্ণ চাৰ্ভেৰ সাৰাংশ, কংগ্ৰেছে কম বেছি পৰিমাণে ৪৯ৰ পৰা ৬৪খন আসন লৈ হাৰিয়ানাত পুনৰ ক্ষমতালৈ অহাৰ সম্ভাৱনা আছে। অর্থাৎ ১০ বছৰৰ পাছত হাৰিয়ানাত পুনৰ ক্ষমতা দখল কৰিব কংগ্ৰেছ শিবিৰে৷ এগজিট প’লে জয়ৰ ইংগিত দিয়াৰ লগে লগে কংগ্ৰেছ কৰ্মীসকলে উল্লাসৰ সৃষ্টি কৰে। ভোটগণনাৰ পূৰ্বে দিল্লীত আৰম্ভ হৈছিল উদযাপন।
কিন্তু সময়ৰ লগে লগে ছবিখন সলনি হৈ যায়। ইভিএম খোলাৰ লগে লগে গেৰুৱা শিবিৰ আগবাঢ়িবলৈ ধৰিলে। গণনাৰ দুঘণ্টামানৰ ভিতৰতে বিজেপিৰ প্ৰাৰ্থীসকলে ৪৬খন আসনৰ যাদুকৰী সংখ্যালৈ আগবাঢ়িল। ইয়াৰ পিছত মুখ্যমন্ত্রী নায়ব সিং ছাইনীয়ে কয় যে বিগত ১০ বছৰত বিজেপি চৰকাৰে বহু কাম কৰিছে৷ মনোহৰলাল খট্টৰে মুখ্যমন্ত্ৰী হিচাপে যি ব্যৱস্থা সৃষ্টি কৰিছে, তাৰ পৰা হাৰিয়ানাৰ জনসাধাৰণ উপকৃত হৈছে। তৃতীয়বাৰৰ বাবে চৰকাৰ গঠন কৰি সেই কামক আৰু আগুৱাই লৈ যাম।” মন কৰিবলগীয়া যে বিগত বিধানসভা নিৰ্বাচনত বিজেপিয়ে এটাও সংখ্যাগৰিষ্ঠতা লাভ কৰা নাছিল। জেজেপিৰ সহযোগত তেওঁলোকে চৰকাৰ গঠন কৰিছিল।
