টছত জয়লাভ কৰি প্ৰথমতে বলিং কৰি বিপক্ষৰ ৰান অনুসৰণ কৰি লক্ষ্যত উপনীত হোৱাটোৱে টী-২০ ক্ৰিকেটৰ মূল মন্ত্ৰ। কিন্তু টছত জয়ী হৈ প্ৰথমে বেটিং কৰি ডাঙৰ ৰানৰ লক্ষ্য নিদিয়াকৈয়ো যে জয়ৰ সমীকৰণ সলনি কৰি দিব পাৰি, সেয়া দেওবাৰে লক্ষ্ণৌত প্ৰত্যক্ষ কৰে আলহী দলটোৱে। গুজৰাটৰ বেটিং অৰ্ডাৰত ধুমুহাৰ সৃষ্টি কৰি অনায়াসে মেচখন উলিয়াই নিলে ৰাহুল বাহিনীয়ে। বেটিঙৰ উপৰিও আকৌ এবাৰ দৃষ্টি আকৰ্ষণ কৰিলে ৰাহুলৰ নেতৃত্বই।
আই পি এলত পূর্বৰ চাৰিখন মেচত প্রতিবাৰেই লক্ষ্ণৌক পৰাস্ত কৰিছে গুজৰাট টাইটানছে৷ অৰ্থাৎ আহমেদাবাদেই হওক বা ৰাহুলৰ ঘৰুৱা খেলপথাৰেই হওক, গিলছে ছুপাৰ জায়েণ্টছক ক’তো ৰেহাই দিয়া নাই। লক্ষ্ণৌ শিবিৰত প্ৰতিশোধৰ জুই উমি উমি জ্বলি আছিল। অৱশেষত দেওবাৰে সন্ধিয়া সেই প্ৰতিশোধৰ লক্ষ্য পূৰণ হয়। মধুৰ প্ৰতিশোধৰ সৈতে আহিছিল জয়ৰ হেট্ৰিক।
দেওবাৰৰ দিনটোতে লক্ষ্ণৌৰ ইনিংছ ১৬৪ ৰানতে সমাপ্ত হয় কাৰণ বেটছমেনসকলে তেনেকৈ বিস্ফোৰক হৈ উঠিব নোৱাৰিলে। ষ্টয়নিছৰ ৫৮ ৰান আৰু অধিনায়ক কে এল ৰাহুলৰ ৩৩ ৰানৰ বাহিৰে কোনেও ক্ৰীজত বেছি দিন টিকি থাকিব নোৱাৰিলে।
স্ক’ৰকাৰ্ডখন চাই বহুতে অনুভৱ কৰিছিল যে গিল বাহিনীয়ে সহজেই লক্ষ্যত উপনীত হ’ব। কিন্তু বলাৰসকলে তেনে হ’বলৈ নিদিলে। নিখুঁত বলিঙৰ লগতে আছিল চকু কপালত তুলিব পৰা ফিল্ডিং। দুয়োটাৰ তালমিলেৰে লক্ষ্ণৌৱে গুজৰাটক ধৰাশায়ী কৰিলে। ৰবি বিষ্ণোইয়ে কেন উইলিয়ামছনৰ ফ্লাইং কেচ লৈ আউট কৰি জণ্টী ৰোডছৰ কথা মনত পেলাই দিলে।
ইপিনে, যুৱ খেলুৱৈ যশ ঠাকুৰে দুৰ্দান্ত বলিঙেৰে খেল ঘুৰাই দিলে। তেওঁ ৩.৫ অভাৰত মাত্ৰ ৩০ ৰান দি ৫টা উইকেট দখল কৰে। গুজৰাটৰ বেটিং অৰ্ডাৰ ভাঙি পৰাত ক্ৰুনাল পাণ্ডিয়াইও ডাঙৰ ভূমিকা পালন কৰিছিল। তেওঁ ১১ ৰাণত তিনিটা উইকেট দখল কৰে। এই দুই বলাৰৰ পৰাক্ৰমত ১৩০ ৰানতে থমকি ৰয় যোৱাবাৰৰ ৰানাৰ্ছ আপ গুজৰাট।
কিন্তু জয়ৰ পিছতো মায়ংক যাদৱৰ আঘাতে কিছু চিন্তাৰ সৃষ্টি কৰে। এটা অভাৰ বলিং কৰাৰ পিছত বৰ্তমানৰ আই পি এলৰ স্পীডষ্টাৰগৰাকী ভৰিৰ বিষৰ বাবে খেলপথাৰ এৰি যায়। তাৰ পিছত আৰু তেওঁক ফিল্ডিং কৰা দেখা নগ’ল।
সংক্ষিপ্ত স্কোৰঃ
লক্ষ্ণৌ ছুপাৰ জায়েন্টছঃ ১৬৩/৫ (ষ্টয়নিছ-৫৮, ৰাহুল-৩৩)
গুজৰাট টাইটানছ: ১৩০/১০ (সুদৰ্শন-৩১, টিওটিয়া-৩০)
লক্ষ্ণৌ ছুপাৰ জায়েন্টছে ৩৩ ৰানত জয়লাভ কৰে।
