নিজৰ ৮ বছৰীয়া প্ৰেম ঘূৰাই বিচাৰি হাতত প্লেকাৰ্ড লৈ প্ৰেমিকাৰ ঘৰৰ সন্মুখত যুৱকৰ ধৰ্ণা
পুনৰ ঘটিছে এনে এক ব্যতিক্ৰমী ঘটনা। কিছুদিন পূৰ্বে পশ্চিমবংগৰ ধূপগুড়ি আৰু তুফানগঞ্জত এনে ঘটনা সংঘটিত হোৱাৰ পাছত এইবাৰ ৰাজ্যখনত পুনৰ দেখা গৈছে প্ৰেমিকৰ ৰাজহুৱা বিলাপ।
ৰাজ্যখনৰ বাগনান থানাৰ নবাসন গাঁৱত এগৰাকী প্ৰেমিক যুৱকে প্ৰেমিকাৰ ঘৰৰ সন্মুখত ধৰ্ণা দি সকলোৰে দৃষ্টি কাঢ়িছে।
শনিবাৰে নিজৰ ৮ বছৰীয়া প্ৰেম ওভোটাই দিয়াৰ দাবী তুলি ২৪ বছৰীয়া প্ৰেমিক যুৱকজনে প্ৰেমিকাৰ ঘৰৰ সন্মুখত ধৰ্ণাত বহে।
চলিত বৰ্ষৰ জুন মাহত ধূপগুড়িৰ অনন্ত বৰ্মন নামৰ নামৰ যুৱকজনে প্ৰেমিকা লিপিকা বৰ্মনৰ পৰা তেওঁৰ ৮ বছৰৰ ভালপোৱা ওভোটাই বিচাৰি ধৰ্ণাত বহিছিল।
ইয়াৰ কিছুদিন পাছতে একেদৰে হেৰুওৱা প্ৰেম ওভোটাই বিচাৰি ধৰ্ণাত বহিছিল তুফানগঞ্জৰ সঞ্জয় দাস নামৰ এজন যুৱকে।
অৱশেষত অনন্ত বৰ্মনে সকলো বাধা অতিক্ৰমি লিপিকা বৰ্মনৰ ডিঙিত মালা পিন্ধাবলৈ সক্ষম হৈছিল।
সেই অনুপ্ৰেৰণা লৈয়েই বাগনান নবাসনত ব্যৰ্থ প্ৰেমিক যুৱকজনেও শনিবাৰে নিজৰ হেৰুওৱা প্ৰেম ওভোটাই বিচাৰি প্ৰেমিকা সোমা ওৰফে সোণালী দেড়েৰ ঘৰৰ সন্মুখত ধৰ্ণাত বহে।
হেৰুওৱা প্ৰেম বিচাৰি ধৰ্ণাত বহা শিৱনাথ ৰায় নামৰ যুৱকজনৰ ঘৰ প্ৰেমিকা সোণালীৰ কাষৰ গাঁও পিপুলানত।
যুৱকজনে দাবী কৰে যে বিগত আঠ বছৰ ধৰি সোণালীৰ সৈতে তেওঁৰ প্রেমৰ সম্পর্ক আছিল। কিন্তু স্থানীয় এটা পেপাৰ মিলত মাহিলী পাঁচ হাজাৰ টকাত চাকৰি কৰা শিৱনাথক সোণালীৰ ককায়েক আৰু দেউতাকে সোণালীক বিয়া দিবলৈ ৰাজী নহয়।
কিছুদিন ধৰি সোণালীৰ পৰিয়ালৰ লোকসকলে সোণালীক জোৰ কৰি বুজাই শিৱনাথৰ পৰা আঁতৰাই ৰাখিবলৈ চেষ্টা কৰি আহিছে। পৰিয়ালৰ ভয়ত সোণালীয়েও শিৱনাথক এৰাই চলিছে।
নিজৰ দাবীৰ প্ৰমান হিচাপে শিৱনাথে বহুকেইখন ছবি আৰু চিঠি প্ৰদৰ্শন কৰে। ইয়াৰ মাজত আছে সোণালীয়ে শিৱনাথলৈ লিখা চাৰিখন প্ৰেমপত্ৰ।
শিৱনাথে উক্ত ছবি আৰু চিঠি পোষ্টাৰ আকাৰত সোণালীৰ ঘৰৰ সন্মুখত লগাই ধৰ্ণাত বহে। তাত লিখিছে,’’ তোমালোকে যিয়ে যি নোকোৱা কিয় মোৰ ভালপোৱা ওভোটাই বিচাৰো, তোমালোকে যিয়ে যি নোকোৱা কিয় মই সোণালীক বিচাৰো।‘’
সোণালীৰ উদ্দেশ্যে শিৱনাথে পোষ্টাৰত লিখিছে,’’জীৱন যন্ত্ৰণা তুমি নুবুজিলা, মোৰ কামনা মোৰ কাষলৈ উভতি আহা।‘’
শিৱনাথে তেওঁৰ এই কাৰনামা ফেইচবুক লাইভৰ জৰিয়তে ভাইৰেল কৰি দিয়ে। মুহূৰ্ততে নবাসন গাঁও লোকে লোকাৰণ্য হৈ পৰে।
সোণালী বৰ্তমান স্নাতক দ্বিতীয় বাৰ্ষিকৰ ছাত্ৰী। সোণালীৰ পৰিয়ালে জানিব দিয়া মতে কিছুদিন পূৰ্বে দুজনৰ বিয়াৰ সন্দৰ্ভত শিৱনাথৰ পৰিয়ালৰ সৈতে কখা হওতে তেওঁলোকে মোটা অংকৰ টকা যৌতুক হিচাপে দাবী কৰাৰ বাবে বিয়াখন সম্ভৱ নহ’ল।
তেওঁলোকে লগতে কয় যে ছোৱালীজনী নাবালিকা হৈ থাকোতে ভুল কৰি ল’ৰাজনক ভাল পাইছিল। তাই এতিয়া ডাঙৰ হৈছে আৰু কথাবোৰ বুজি পোৱা হৈছে। সেয়েহে, তাই এতিয়া শিৱনাথৰ সৈতে বিয়াত বহিবলৈ সন্মত নহয়।
ইপিনে, শিৱনাথৰ মাহীয়েকে জানিবলৈ দিয়ে যে শিৱনাথ আৰু সোণালী দুয়ো দুয়োকে সৰুৰে পৰা ভাল পাইছিল। কিন্তু এতিয়া ছোৱালীজনীক আঁতৰাই নিয়া হৈছে। তেওঁলোকে বিচাৰে শিৱনাথৰ জীৱনৰ আঠবছৰৰ সেই প্ৰেম ভালপোৱা ছোৱালী পক্ষই ঘুৰাই দিয়ক।
বৰ্তমানলৈ ছোৱালী পক্ষই বিয়াৰ বাবে সন্মতি প্ৰদান কৰা নাই বুলি জানিব পৰা গৈছে।