বৰপেটা জিলাৰ পাঠশালাত এজন বন্ধুক নৃশংসভাৱে হত্যা কৰাৰ অভিযোগত এজন যুৱকক আৰক্ষীয়ে গ্ৰেপ্তাৰ কৰিছে।
গ্ৰেপ্তাৰ হোৱা যুৱকজন ২২ বছৰীয়া ৰজিবুল আলী বুলি চিনাক্ত কৰা হৈছে।
ৰজিবুলে নিজৰ বন্ধুজনক নৃশংসভাৱে কুঠাৰেৰে আক্ৰমণ কৰি হত্যা কৰে আৰু মৃতদেহটো পাঠশালা চহৰস্থিত আই টি আইৰ সমীপৰ টিটকা গাঁৱৰ কোনো অঞ্চলত পুতি থয়।
হত্যাৰ বলি হোৱা যুৱকজন বৰপেটা জিলাৰে পূব-তপাবৰিৰ পাৰছ আলীৰ ২১ বছৰীয়া পুত্ৰ আব্বাছ আলী বুলি চিনাক্ত কৰিছে।
হত্যাকাণ্ডটো ৰজিবুলে সংঘটিত কৰা বুলি আৰক্ষীৰ আগত স্বীকাৰোক্তি দি কয় যে বন্ধুৰ পত্নীৰ সৈতে তেওঁৰ অবৈধ সম্পৰ্ক থকা বাবেই বন্ধুজনক হত্যা কৰিছে।
ৰজিবুল আলীয়ে এই চাঞ্চল্যকৰ হত্যাকাণ্ডটো ১৬ ফেব্ৰুৱাৰি অৰ্থাৎ দেওবাৰে নিশা সংঘটিত কৰিছিল।
পাঠশালা আৰক্ষীয়ে এই ঘটনাৰ অভিযোগ লাভ কৰাত লগে লগে অনুসন্ধান আৰম্ভ কৰি কালপ্ৰিটজনক গ্ৰেপ্তাৰ কৰিবলৈ সক্ষম হয়।
আৰক্ষীয়ে হত্যাকাৰী যুৱকজনৰ বিৰুদ্ধে ভাৰতীয় দণ্ডবিধিৰ ৩০২ নং ধাৰাৰ অধীনত ৯৮/২০২০ নম্বৰত এটা গোচৰ ৰুজু কৰিছে।
উল্লেখ্য যে স্থানীয় লোকসকলে এই ঘটনাক নিন্দা জনোৱাৰ লগতে গ্ৰেপ্তাৰ হোৱা যুৱকজনক অতি শীঘ্ৰে উচিত শাস্তি প্ৰদানৰ দাবী উত্থাপন কৰে।
