“যেতিয়ালৈকে এইখন চৰকাৰ থাকিব সাংবিধানিক প্ৰমূল্যবোধ, গণতন্ত্ৰ ৰক্ষা কৰা অসম্ভৱ”

দেশৰ স্বাধীনতা দিৱস উদযাপনৰ মুহূৰ্তত গণতান্ত্ৰিক ব্যৱস্থাৰ প্ৰতি ভাবুকিৰ সৃষ্টি কৰা চাৰিটা প্ৰশ্ন দাঙি ধৰা হৈছে। ইয়াত উত্তৰ দিছে যুৱ নেতা প্ৰণৱজ্যোতি চেতিয়াই –

প্ৰশ্নঃ স্বাধীনতাৰ ৭৬ বৰ্ষত আমাৰ দেশ আজি  এক অস্বাভাবিক সংকটৰ গৰাহত।  এতিয়া আমাৰ কাৰণে আটাইতকৈ ডাঙৰ প্ৰত্যাহ্বান কি বুলি আপুনি ভাবে?

উত্তৰঃ বৰ্তমান সময়ত গণতন্ত্ৰ ভয়াবহ সংকটত ।  এইটোৱেই দেশৰ আটাইতকৈ ডাঙৰ সংকট। শাসকীয় চৰকাৰখনৰ স্বৈৰাচ্ছাৰিতাই দেশৰ সংবিধানৰ মৌলিক গাঁথনিৰ প্ৰতি ভাবুকি কঢ়িয়াই আনিছে। 

প্ৰশ্নঃ গণতন্ত্ৰৰ লগত অৰ্থনৈতিক সমতাৰ প্ৰশ্নটো আপুনি কেনেকৈ চাব?

উত্তৰঃ অৰ্থনৈতিক সমতা নাইকীয়া কৰি গণতান্ত্ৰিক মূল্যবোধ হত্যা কৰি কেৱল পুঁজিপতিৰ সুৰক্ষাৰ স্বাৰ্থত উঠি পৰি লাগিছে চৰকাৰে। ই গণতন্ত্ৰৰ বাবে ভাবুকি । কেৱল দুটা শ্ৰেণীৰ সৃষ্টি কৰিব বিচাৰিছে – এটা হৈছে অতি ধনী আৰু আনটো আনৰ হাতলৈ চাই জীয়াই থকা অতি দৰিদ্ৰ, যিয়ে খাই জীয়াই থকাৰ বাদে অন্য কথা ভাবিব নোৱাৰে ।

প্ৰশ্নঃ এই যে বৰ্তমান চৰকাৰে নিৰ্বিচাৰে ৰাজহুৱা সম্পদ আৰু সম্পত্তিবোৰ ব্যক্তিগত পুঁজিপতিক গতাই দিছে তাৰ ভৱিষ্যত পৰিনাম কি হ’ব বুলি ভাবে?

উত্তৰঃ সকলো ৰাজহুৱা খণ্ডৰ সম্পদ পুঁজিপতিক গতাই দিয়াৰ যি চক্ৰান্ত চলিছে তাৰ উদাহৰণ – লাভত চলি থকা জাগীৰোড পেপাৰ মিলটো। আজি বিভিন্ন স্থানত হাজাৰ হাজাৰ বিঘা মাটি পুঁজিপতি বণিয়াক গতাই দি ভূমিৰ অধিকাৰ হস্তান্তৰ কৰাৰ যি ষড়যন্ত্ৰ চলিছে ই জাতিটোক অন্ধকাৰৰ দিশলৈ লৈ যাব। কাৰণ মাটি থাকিলেহে জাতি থাকিব। যি জাতিৰ দখলত মাটি নাই সেই জাতি এনেই নিঃশেষ হৈ যাব এদিন।

প্ৰশ্নঃ আজিৰ  পৰিস্থিতিত আমি কেনেকৈ সাংবিধানিক প্ৰমূল্য আৰু গণতান্ত্ৰিক অনুষ্ঠানৰ সমূহৰ স্বতন্ত্ৰতা ৰক্ষা কৰিম?

উত্তৰঃ যেতিয়ালৈকে এইখন চৰকাৰ থাকিব সাংবিধানিক প্ৰমূল্যবোধ , গণতন্ত্ৰ ৰক্ষা কৰা অসম্ভৱ। ৰাইজ সজাগ হৈ শাসনৰ গাদীৰ পৰা বিজেপিক আঁতৰাব নোৱাৰিলে তাৰ ফল জনতাই ভুগিয়েই থাকিব লাগিব ।