ৰাজ্যজুৰি বিগত দুদিন ধৰি উদযাপন কৰা হ’ল ফল্গুৎসৱ। পিছে এই আনন্দোল্লাসৰ মাজতে বঙাইগাঁও জিলাত হোলী উদযাপনৰ সময়ত মন্দিৰ চৌহদত এগৰাকী যুৱক দাৰ আক্ৰমণৰ ফলত প্ৰাণ হেৰুৱায় এগৰাকী ব্যক্তিয়ে।
এই ভয়াৱহ আক্ৰমণত আন দুগৰাকী ব্যক্তিও আহত হয়। যোগীঘোপাৰ পল্লীৰতল পালপাৰা মন্দিৰত আয়োজন কৰা দৌল উৎসৱ উদযাপনৰ সময়তে এই চাঞ্চল্যকৰ ঘটনা সংঘটিত হয়।
প্ৰকাশিত খবৰ অনুসৰি, প্ৰসাদ বিতৰণক লৈ তৰণী দাস আৰু কৃষ্ণ শীল নামৰ ব্যক্তি দুগৰাকীৰ মাজত তীব্ৰ তৰ্ক-বিতৰ্কৰ সৃষ্টি হয়। ক্ৰমাৎ উত্তপ্ত হৈ পৰা পৰিস্থিতিৰ মাজতে অভিযুক্ত শীলে এখন দাৰে তৰণী দাসক আক্ৰমণ কৰে।
আনহাতে ৰবীন চন্দ্ৰ শীল আৰু সাধন পল নামৰ দুগৰাকী যুৱকে আক্ৰমণকাৰী কৃষ্ণ শীলক বাধা দিবলৈ চেষ্টা চলায় যদিও দাৰ ঘাপত দুয়ো যুৱকো আহত হয়।
আহত দুয়োগৰাকী যুৱককে চিকিৎসাৰ বাবে কাষৰীয়া এক চিকিৎসালয়লৈ লৈ যোৱা হয় বুলি স্থানীয় লোকসকলে জানিবলৈ দিয়ে।
ইফালে ঘটনাৰ সময়ত অভিযুক্ত শীল আৰু হত্যাৰ বলি হোৱা তৰণী দাস দুয়োগৰাকীয়েই মদ্যপান কৰি আছিল বুলি সন্দেহ কৰা হৈছে।
ইতিমধ্যে আৰক্ষীয়ে ঘটনা সন্দৰ্ভত তদন্ত আৰম্ভ কৰিছে আৰু পলাতক অভিযুক্ত কৃষ্ণ শীলক গ্ৰেপ্তাৰৰ উদ্দেশ্যে শীলৰ সন্ধান চলাই আছে বুলি জানিবলৈ দিয়ে।
