পৃথিৱীৰ বৃহৎ নদীদ্বীপ তথা সত্ৰীয়া সংস্কৃতিৰ বৰঘৰ মাজুলীক লৈ নতুন সপোন দেখিছে অসমীয়া সংগীতজগতৰ জনপ্ৰিয় কন্ঠশিল্পী জুবিন গাৰ্গে। অতীজৰে পৰা মাজুলীৰ সৈতে জুবিনৰ সম্পৰ্ক অতি ঘৰুৱা। মাজুলীক লৈ জনপ্ৰিয় গানো লিখিছে তেওঁ।
গীত-মাত, ভাওনা-সবাহেৰে পুলকিত হৈ থকা মাজুলীত জুবিনে এইবাৰ নিৰ্মাণ কৰিব পৰ্যটক ভৱন। সদায় দেশী-বিদেশী পৰ্যটকৰ আকৰ্ষণৰ কেন্দ্ৰবিন্দু হৈ থকা মাজুলীৰ মনোমোহা লুইতৰ পাৰত নিৰ্মান হ’বলগীয়া পৰ্যটক ভৱনটিৰ নাম কাঞ্চনজংঘা ৰখা হ’ব বুলি জুবিনে সংবাদ মাধ্যমক জানিবলৈ দিয়ে।
বুধবাৰে বিশ্ব পৰিবেশ দিৱসৰ দিনাখন মাজুলীত উপস্থিত হোৱা জনপ্ৰিয় শিল্পীজনে মানুহৰ মাজত প্ৰকৃতি সম্পৰ্কে সজাগতা সৃষ্টিৰ লক্ষ্যৰে লুইতৰ পাৰৰ চাৰিবিঘা মাটিত গছপুলি ৰোপণ কৰে।
আনহাতে, মাজুলীত জুবিন গাৰ্গে পৰ্যটক ভৱন নিৰ্মান কৰিব খোজা পদক্ষেপক মাজুলীৰ সকলো স্তৰৰ লোকে আদৰণি জনাইছে।
উল্লেখযোগ্য যে, পৰিবেশক লৈ সদা সচেতন জুবিন গাৰ্গে প্ৰতিবছৰে ৰাজ্যৰ বিভিন্ন স্থানত গছপুলি ৰোপন কৰি বিশ্ব পৰিবেশ দিৱস পালন কৰি আহিছে। তেওঁ বিশ্ব পৰিবেশ দিৱসৰ দিনাখন সেই অঞ্চলটোত গছপুলি ৰোপন কৰাৰ লগতে অঞ্চলটোৰ জনসাধাৰণক প্ৰকৃতি আৰু পৰিবেশৰ প্ৰতি সজাগ কৰি তোলাৰ বাবে চেষ্টা কৰে।
