বোকাখাতৰ অভিলাষ প্ৰকাশনে আসাম ফাইন আৰ্টচ একাডেমীৰ সহযোগত বিগত বছৰৰ দৰে এইবাৰো দেওবাৰে বোকাখাতত আয়োজন কৰে ৰঙৰ পৃথিৱী নামৰ এখন চিত্ৰাংকন প্ৰতিযোগিতা।
উল্লেখযোগ্য যে বোকাখাত জে ডি এছ জি মহাবিদ্যালয়ৰ অধ্যাপিকা ড০ ৰুবী বৰাই তেওঁৰ একমাত্ৰ পুত্ৰ অভিলাষৰ ২০১১ চনত হোৱা আকস্মিক মৃত্যুৰ পিছৰে পৰা পুত্ৰৰ জন্মদিনটোত এই চিত্ৰঙ্কন প্ৰতিযোগিতাৰ আয়োজন কৰি আহিছে। ইয়াৰ উপৰিও ৰুবী বৰাই ‘অভিলাষ প্ৰকাশন’ নামেৰে এককভাৱে এক অনুষ্ঠানৰ জন্ম দি কেইবাখনো পুঁথিও প্ৰকাশ কৰিছে ৷
প্ৰথম অৱস্থাত মহকুমা পৰ্যায়ত আয়োজিত এই চিত্ৰাঙ্কন প্ৰতিযোগিতা ২০১৭ চনৰ পৰা মহকুমাৰ পৰা জিলা পৰ্যায়লৈ উন্নীত কৰি ৰঙৰ পৃথিৱী নামেৰে অনুষ্ঠিত কৰি আহিছে ৷ আজি অভিলাষৰ ২৩ সংখ্যক জন্মদিনৰ দিনটোত বোকাখাতৰ সত্যনাৰায়ণ সেৱা সদনত গোলাঘাট জিলা ভিত্তিত চিত্ৰাংকন প্ৰতিযোগিতাৰ অনুষ্ঠিত হোৱা এই চিত্ৰাংকন প্ৰতিযোগিতাত জিলাখনৰ প্ৰায় দুই সহস্ৰাধিক প্ৰতিযোগিয়ে অংশ গ্ৰহণ কৰে।
প্ৰতিযোগিতাৰ ফলাফল অহা ১১ জুনত ঘোষণা কৰা হ’ব বুলি অভিলাষ প্ৰকাশনৰ তৰফৰ পৰা জনোৱা হৈছে।
অনুষ্ঠানৰ আৰম্ভণিতে বোকাখাতৰ মহকুমাধিপতি বিবেক শ্যাম, অভিলাষৰ আইতাক, নগাঁৱৰ চিত্ৰশিল্পী হেমন্ত চাহু, চিত্ৰশিল্পী পাপু ঘোষে বন্তি প্ৰজ্বলেনেৰে আৰম্ভ কৰাৰ প্ৰতিযোগিতাখন আনুষ্ঠানিকভাৱে উদ্বোধন কৰে বোকাখাতৰ মহকুমাধিপতি বিবেক শ্যামে ৷
অনুষ্ঠানত মহকুমাধিপতিৰ লগতে চিত্ৰশিল্পী হেমন্ত চাহু, পাপু ঘোষ, সাংবাদিক বুবুল দত্তই শুভেচ্ছামুলক বক্তব্য প্ৰদান কৰে ৷ অভিলাষ প্ৰকাশনৰ স্বত্বাধিকাৰ ড০ ৰুবী বৰাই আদৰণি ভাষণ প্ৰদান কৰা অনুষ্ঠানটোৰ আঁত ধৰে ৰূপজ্যোতি ভঁৰালীয়ে।
