জাতিধ্বংসী নাগৰিকত্ব সংশোধনী বিধেয়ক,সাম্প্ৰতিক সময়তো সমাজক গ্ৰাস কৰি থকা অন্ধবিশ্বাস- কুসংস্কাৰ, অসমৰ মাতৃভাষাৰ সংকট আৰু লোকপিয়লত খিলঞ্জীয়া ভাষাৰ অস্তিত্ব প্ৰসংগত কালি নগাঁও জিলা সাহিত্য সভাৰ উদ্যোগত কমলা দেৱী তোদী স্মৃতিভৱনত এখন ৰাইজমেল অনুষ্ঠিত হয়।
নগাঁও জিলা সাহিত্য সভাৰ উপসভাপতি নিত্যানন্দ বৰাৰ সভাপতিত্বত অনুষ্ঠিত সভাত আৰম্ভণিতে অসম সাহিত্য সভাৰ প্ৰধান সম্পাদক পদুম ৰাজখোৱাই অসম সাহিত্যসভাই আৰম্ভ কৰা ৰাইজমেলৰ লক্ষ্য-উদ্দেশ্যৰ কথা প্ৰকাশ কৰি অসমীয়া জাতীয় জীৱন কিদৰে গভীৰ সংকটত পৰিছে সেই কথা বিশ্লেষণ কৰে আৰু বৰ্তমানৰ সংকট কালত অসমৰ প্ৰতিগৰাকী জাতীয় চেতনাসম্পন্ন ব্যক্তিকে মাতৃভূমি আৰু মাতৃভাষাৰ হকে ওলাই আহিবলৈ আহ্বান জনায়।
অসমীয়া জাতীয় জীৱন আৰু খিলঞ্জীয়া মাতৃভাষাৰ বিৰুদ্ধে গভীৰ ষড়যন্ত্ৰ আৰম্ভ হৈছে বুলি প্ৰকাশ কৰি প্ৰধান সম্পাদকজনে বিচ্ছিন্নতাবাদীসকলৰ সকলো অপচেষ্টা ব্যৰ্থ কৰি জাতিটোক ৰক্ষা কৰিবলৈ অসম হিতৈষী প্ৰতিজন নাগৰিক আৰু জাতীয় তথা জনগোষ্ঠীয় সংগঠনসমূহক ঐক্যবদ্ধভাৱে সংগ্ৰাম কৰিবলৈ আহ্বান জনায়। অসমৰ চাহ জনগোষ্ঠী আৰু চৰ অঞ্চলৰ মুছলমানসকলৰ অৱদানৰ কথাও তেওঁ উল্লেখ কৰে।
নগাঁও জিলা সাহিত্য সভাৰ সম্পাদক মৃণাল হাজৰিকাই আঁত ধৰা সভাত বিশিষ্ট লেখক সমালোচক ড° জ্যোতিৰ্ময় জানাই বৰ্তমান অসমৰ জ্বলন্ত সমস্যাবোৰৰ বিৰুদ্ধে সবল জনমত গঠন কৰিব লাগিব বুলি মত প্ৰকাশ কৰে। বঙালী ভাষাৰ একাংশ লোকেও অসমীয়া ভাষা-সাহিত্যৰ বাবে কাম কৰি গৈছে, সেই কথাও মনত ৰাখিব লাগিব বুলি ব্যক্ত কৰি লেখকগৰাকীয়ে অসমীয়া ভাষা আৰু জাতীয়তাৰ কাৰণে সকলোৱে ঐক্যবদ্ধ হৈ কাম কৰিব লাগিব বুলি মত প্ৰকাশ কৰে।
নগাঁও জিলা সাহিত্য সভাৰ প্ৰাক্তন সভাপতি উপেন্দ্ৰ বৰকটকীয়ে বক্তৃতা দাঙি ধৰি কয় যে- নাগৰিকত্ব সংশোধনী বিধেয়ক বাতিলকৰণ প্ৰসংগত অসমৰ মুখ্যমন্ত্ৰী সৰ্বানন্দ সোণোৱাল দৃঢ় হ’ব লাগিব। কাৰণ, তেওঁক জাতীয় নায়কৰ সন্মান দিয়া হৈছে। আন ৰাজ্যৰ পৰা অহাসকলে কৰ্মভূমিক জন্মভূমি হিচাপে গ্ৰহণ কৰিব লাগিব বুলিও সাহিত্যিকগৰাকীয়ে মন্তব্য দিয়ে।
বিদ্যালয়সমূহৰ অৱসৰপ্ৰাপ্ত পৰিদৰ্শক প্ৰেমেশ্বৰ দাস, প্ৰাক্তন অধ্যক্ষ হিতেশ্বৰ লস্কৰ, অসম সাহিত্য সভাৰ নগাঁও আঞ্চলিক কাৰ্যালয়ৰ আঞ্চলিক সম্পাদক যতীন্দ্ৰনাথ সূত, জিলাৰ প্ৰাক্তন উপ-সভাপতি ভৱেশ মেধী, ৰজত বৰা, শিল্পী জগন্নাথ মহন্ত, লেখক বিনু লস্কৰ ঠাকুৰীয়া, জিলা আৰু আঞ্চলিক ছাত্ৰ সন্থাৰ বিষয়ববীয়া আদি উপস্থিত থকা সভাত সদৌ অসম ছাত্ৰ সন্থাৰ উপ-সভাপতি মণিমাধৱ মহন্তই নাগৰিকত্ব সংশোধনী বিধেয়ক বাতিলকৰণ প্ৰসঙ্গত সৰ্বভাৰতীয় স্তৰত এটা জনমত সৃষ্টি কৰিব লাগিব বুলি মত প্ৰকাশ কৰে।
তেওঁ লগতে কয়, এই যুঁজ বঙালী লোক বা বঙালী ভাষাৰ বিৰুদ্ধে নহয়, এই যুঁজ মুছলমানসকলৰ বিৰুদ্ধে নহয়। এই যুঁজ কেৱল অসমীয়া ভাষাৰ হকে, অসমীয়া জাতিৰ হ’কে। সভাত মোহিনী মোহন ডেকাই বৰ্তমান সময়ত অসম সাহিত্য সভাই অধিক সক্ৰিয়ভাৱে জাতীয় জীৱনৰ হ’কে কাম কৰাৰ বাবে প্ৰশংসা কৰি অসমৰ সাংসদসকলে ৰাজ্যখনৰ জ্বলন্ত সমস্যাৰাজি, অসমীয়া জাতীয় জীৱন আৰু খিলঞ্জীয়া মাতৃভাষাৰ দুৰ্দশাৰ ছবিখন দিল্লীত দাঙি ধৰাত ব্যৰ্থ হৈছে বুলি ক্ষোভ প্ৰকাশ কৰে।
সভাত শংকৰী সংস্কৃতিৰ বিশিষ্ট পণ্ডিত তিলকচন্দ্ৰ মজুমদাৰে অসমীয়া ভাষাৰ সম্ভ্ৰান্ত ইতিহাসৰ ওপৰত আলোকপাত কৰি অসমীয়া জাতীয় জীৱন আৰু অসমীয়া ভাষাৰ সংকট কালত সকলোকে সচেতন ভূমিকা ল’বলৈ আহ্বান কৰে। সভাত শিশু সাহিত্যিক কাৰুণ্য ভট্টাচাৰ্য, সমাজকৰ্মী হোমেশ্বৰ দেৱশৰ্মা, প্ৰীতিমোহন শৰ্মা আদিয়েও ভাষণ দি চৰকাৰক নাগৰিকত্ব সংশোধনী বিধেয়ক বাতিল কৰিবলৈ আৰু অন্ধবিশ্বাস-কুসংস্কাৰৰ পৰা মুক্ত হৈ বিজ্ঞানসন্মত মনৰ অধিকাৰী হ’বলৈ সকলোকে সজাগ হ’বলৈ আহ্বান জনায়।
