অৰুণাচল প্ৰদেশত জনগোষ্ঠীয় পৰম্পৰাৰ নামত ঘটা এটা চৰম লজ্জাজনক তথা উদ্বেগজনক ঘটনাই সকলোৰে চকু কপালত তুলিছে। যদিও অৰুণাচলৰ মানুহৰ বাবে এই ঘটনাটো কোনো ব্যতিক্ৰম নহয়, বৰং ই এটা লোক পৰম্পৰাৰ গতানুগতিক দৃশ্য, ইয়াৰ সৈতে জড়িত হৈ থকা বিপন্ন পশু-পক্ষী নিধনৰ বিষয়টোৱে সকলো প্ৰকৃতিপ্ৰেমী তথা সচেতন লোকক হতবাক কৰি তুলিছে।
বিশেষকৈ মানুহে প্ৰশ্ন তুলিছে পেমা খাণ্ডুৰ চৰকাৰৰ ভূমিকাক লৈ। প্ৰশ্ন তুলিছে পৰিৱেশ মন্ত্ৰী প্ৰকাশ জাভেডকাৰৰ নীৰৱতাক লৈও।
উল্লেখযোগ্য যে যোৱা ৭ মাৰ্চত অৰুণাচল প্ৰদেশৰ আদি জনগোষ্ঠীৰ এটা বাৰ্ষিক উৎসৱ ‘য়ুনায়িং আৰন’ উদযাপিত হৈছিল। এই উৎসৱৰ পৰম্পৰামতে হাবিৰ পৰা পুৰুষসকলে চিকাৰ কৰি অনা শ শ হিচাপত বিভিন্ন বিপন্ন প্ৰজাতিৰ চৰাই-পশু আদি মুকলিকৈ প্ৰদৰ্শন কৰাৰ লগতে সেইবোৰক কেন্দ্ৰ জনগোষ্ঠীটোৰ লোকসকলক কৰি আনন্দ-স্ফূৰ্তিত ভাগ লোৱা দেখা গৈছিল।
কিন্তু প্রশ্ন হৈছে সমগ্ৰ বিশ্বতে বিপন্ন প্ৰজাতিৰ চৰাই আৰু জন্তুৰ সংৰক্ষৰ বাবে প্ৰকৃতিবিদ তথা প্ৰকৃতিপ্ৰেমীসকলে কাম কৰি থকাৰ লগতে সজাগতা সৃষ্টিৰ বাবে চেষ্টা কৰি থকাৰ পিছতো, এই সম্পৰ্কীয় বিভিন্ন আইন গঢ় লৈ উঠাৰ পিছতো এই বৃহৎ নিধন যজ্ঞটো ইমান মুকলিকৈ আৰু বাধাহীনভাৱে আয়োজিত হ’বলৈ পালে কেনেকৈ?
বিজেপি শাসিত প্ৰদেশখনৰ মুখ্য মন্ত্ৰীজনৰ ভূমিকা সম্পৰ্কতো বহুতে প্ৰশ্ন উত্থাপন কৰিছে। কেনেকৈ চৰকাৰখনে এইবোৰ কৰিবলৈ অনুমতি দিব পাৰিলে বুলি প্ৰশ্ন উত্থাপন কৰিছে প্ৰকৃতিপ্ৰেমীসকলে।
জানিব পৰা মতে, এই বছৰেই নহয়, প্ৰতি বছৰে এই উৎসৱৰ আগ মুহূৰ্তত জনগোষ্ঠীটোৰ পুৰুষসকলে হাবিলৈ চিকাৰ কৰিবলৈ যায়। চিকাৰ কৰি পুৰুষসকলে শ আৰু হাজাৰৰ হিচাপত এই চৰাই আৰু পশুবোৰ মাৰি বা জীৱিত অৱস্থাত ধৰি ঘূৰি অহাৰ পিছতে এইবোৰক শিশুবোৰক খেলিবলৈ দিয়া হয়। তাৰ পিছত সকলোৱে আনন্দ কৰে।
আদি সম্প্ৰদায়ৰ মানুহৰ বসতি প্ৰধান ইটানগৰ আৰু পাচিঘাটত এই উৎসৱ উদযাপন কৰা হয়।
কিন্তু জনগোষ্ঠীয় পৰম্পৰা-উৎসৱৰ নামত বিপন্নপ্ৰায় প্ৰাণীকূল নিধন কৰাটো কিমান গ্ৰহণযোগ্য?
উল্লেখযোগ্য যে অসমত মাঘ বিহুৰ সময়ত ম’হ যুঁজ, কুকুৰা যুঁজ, বুলবুলি চৰাইৰ যুঁজ লগোৱাটো এটা পৰম্পৰা আছিল। কিন্তু যোৱা ২০১৪ চনৰ এটা ৰায়ত উচ্চতম ন্যায়ালয়ে ইয়াক জীৱ-জন্তুৰ প্ৰতি নিষ্ঠুৰতা বুলি ম’হযুঁজ আৰু বুলবুলি চৰাইৰ যুঁজ নিষিদ্ধ কৰি দিয়ে। শেহতীয়াকৈ কুকুৰা যুঁজো নিষিদ্ধ কৰা হয়।
উচ্চতম ন্যায়ালয়ে সকলো ধৰণৰ পশু-পক্ষীৰ যুঁজ লগোৱা আৰু চিকাৰ কৰা নিষিদ্ধ কৰিছে। তেনেস্থলত অৰুণাচল প্ৰদেশৰ এই ঘটনা নিঃসন্দেহে চিন্তনীয়।
