অৰুণাচল প্ৰদেশৰ তৃতীয়গৰাকী মহিলা পৰ্বতাৰোহী হিচাপে এভাৰেষ্ট জয় কৰি সমগ্ৰ দেশবাসীলৈ গৌৰৱ কঢ়িয়াই আনিবলৈ সক্ষম হৈছে ৰয়িঙৰ বাসিন্দা মিৰি লিনগিয়ে।
উল্লেখযোগ্য যে চাৰিটা সন্তানৰ মাতৃ ৪০ বছৰীয়া লিনগিয়ে যোৱা ১৪ মে’ৰ পুৱা এভাৰেষ্টত আৰোহণ কৰিবলৈ সক্ষম হয়।
যোৱা ৫ মাৰ্চত ৰাজ্যসভাৰ সাংসদ মুকুট মিথিয়ে লিনগিৰ যাত্ৰাৰ ফ্লেগ অফ কৰিছিল। আনহাতে ৰয়িঙৰ পৰা যাত্ৰা কৰি ৭ এপ্ৰিলত কাঠমাণ্ডুত উপস্থিত হোৱা লিনগিয়ে ১২ এপ্ৰিলৰ পৰা লুক্লাৰ পৰা মাউণ্ট এভাৰেষ্টলৈ যাত্ৰা কৰে।
অৱশ্যে প্ৰতিকূল বতৰৰ বাবে ২০ এপ্ৰিলত বেছ কেম্পত উপস্থিত হোৱা লিনগিৰ যাত্ৰা নাছিল সুখকৰ।সেয়েহে ১০ মে’ত পুনৰ এভাৰেষ্টলৈ যাত্ৰা আৰম্ভ কৰে লিনগিয়ে।
চাৰিদিন বিৰামবিহীনভাৱে দিনে- নিশাই যাত্ৰা কৰি অৱশেষত ১৪ ম’ৰ পুৱা এভাৰেষ্ট বিজয় কৰিবলৈ সক্ষম হয় এইগৰাকী অদমনীয় শক্তিৰ অধিকাৰী মহিলাই।
ভিন্ন সংবাদ প্ৰতিষ্ঠানে প্ৰকাশ কৰা অনুসৰি লিনগি সম্প্ৰতি সুস্থ অৱস্থাত আছে আৰু হয়তো কিছু দিনৰ ভিতৰতে তেওঁ ঘৰলৈ উভতি আহিব।
উল্লেখযোগ্য যে লিনগিয়ে টিনে মীনাৰ পৰা অনুপ্ৰেৰণা লাভ কৰি ২০১৩ চনত পৰ্বতাৰোহণৰ কেৰিয়াৰ আৰম্ভ কৰিছিল। মীনাৰ সৈতে তেওঁ কেইবাটাও অভিযানত অংশ লৈছিল আৰু ইয়াৰ ভিতৰত উল্লেখযোগ্য আছিল হিমাচল প্ৰদেশত এক মহিলা অভিযানকাৰী দলৰ সদস্য হিচাপে ৬,৬২২ মিটাৰ উচ্চতাৰ মেন্থোছা শৃংগ আৰোহণ।
সেই একে বৰ্ষতে তেওঁ ডিৰাঙৰ এন আই এম এ এছ আৰ্মি প্ৰতিষ্ঠানৰ পৰা পৰ্বতাৰোহণৰ এক পাঠ্যক্ৰম সম্পূৰ্ণ কৰে। ২০১৬ চনত লিনগিয়ে এভাৰেষ্ট আৰোহণকাৰী অংশু জনছেম্পাৰৰ সৈতে আন এক মহিলা পৰ্বতাৰোহণ অভিযানত ৬,২২২ মিটাৰ উচ্চতাৰ গৰিচেন শৃংগ আৰোহণ কৰিছিল।
তাৰ পাছত লিনগিৰ এই সাফল্য স্বাভাৱিকত দেশৰ আন নাৰীসকলৰ বাবে হ’ব এক অনুপ্ৰেৰণাৰ অমল উৎস।
প্ৰসংগক্ৰমে উল্লেখযোগ্য যে ইয়াৰ পূৰ্বে অৰুণাচলৰ মহিলা হিচাপে টিনে মীনা আৰু অংশু জনছেম্পাৰে এভাৰেষ্ট বিজয় কৰিছিল।
