চুবুৰীয়া ৰাজ্যৰ নিৰ্বাচনৰ বাবে অধিগ্ৰহণ কৰা চিটিবাছ সমূহ আজি পৰ্যন্ত উভতি নহা কাৰ্যই স্বাভাৱিকতে যাত্ৰীসকলৰ মাজত এক জটিলতাৰ সৃষ্টি কৰিছে। চিটিবাছ নাটনিৰ ফলত বিগত পোন্ধৰ দিন ধৰি মহানগৰীৰ যাত্ৰীয়ে সীমাহীন দুৰ্ভোগ ভুগিবলগীয়া হৈছে।
নাগালেণ্ড আৰু মেঘালয় বিধানসভা নিৰ্বাচন যোৱা ২৭ ফেব্ৰুৱাৰিতে অনুষ্ঠিত হৈ যায়। তাৰ পিছতো আজিলৈকে অধিগ্ৰহণ কৰা চিটিবাছ সমূহ মুকলি কৰি নিদিয়াৰ বাবে মহানগৰীৰ হাজাৰ হাজাৰ যাত্ৰী ভীষণ আহুকালত পৰা পৰিলক্ষিত হৈছে।
উল্লেখ্য যে চুবুৰীয়া ৰাজ্য দুখনৰ নিৰ্বাচনৰ বাবে অসমৰ পৰা সৰু বৰ গাড়ী প্ৰায় ৩৪০০ খন অধিগ্ৰহণ কৰা হৈছিল। ইয়াৰে প্ৰায় ৩৫০ খনেই গুৱাহাটীত চলাচল কৰা চিটবাছ।
মন কৰিবলগীয়া যে চিটিবাছ নাটনি সম্পৰ্কত মহানগৰীৰ কিছু কিছু যাত্ৰীয়ে ৰাজ্যখনৰ পৰিবহন বিভাগকে দোষাৰূপ কৰা দেখা যায়। কি কাৰণত যাত্ৰীৰ সুবিধাৰ কথা চিন্তা নকৰি এনেদৰে অসমৰ পৰা অন্য ৰাজ্যলৈ বাছ সমূহ প্ৰেৰণ কৰিছে সেয়া এক ডাঙৰ প্ৰশ্ন বুলি ক্ষোভ উজাৰে একাংশ দুৰ্ভোগ ভোগা যাত্ৰীয়ে।
ইফালে অহা ৩ মাৰ্চৰ ভিতৰত অধিগ্ৰহণ কৰা বাহনসমূহ গুৱাহাটী ঘূৰি অহাৰ সম্ভাৱনা আছে বুলি গুৱাহাটী পৰিবহণ সংস্থাৰ কৰ্মকৰ্তাই আমাক জানিবলৈ দিয়ে।
সেয়া যিয়েই নহওক মুঠৰ ওপৰত চিটিবাছৰ অভাৱে মহানগৰবাসীক জুৰুলা কৰা পৰিলক্ষিত হৈছে।
