আজি শিল্পী দিৱস। অসমৰ মহান শিল্পী জ্যোতিপ্ৰসাদ আগৰৱালাৰ মৃত্যু তিথি। অসমৰ বিভিন্ন ঠাইত ৰাইজ, দল-সংগঠনে এই দিনটোক শিল্পী দিৱস হিচাপে উদযাপন কৰি প্ৰতি বছৰে মহান শিল্পীজনাক সুঁৱৰি আহিছে। আজিও বিভিন্ন দল-সংগঠনৰ উপৰি অসম চৰকাৰৰ সাংস্কৃতিক পৰিক্ৰমা বিভাগেও গুৱাহাটীৰ জ্যোতি চিত্ৰবনত কেন্দ্ৰীয়ভাৱে উদযাপন কৰিব শিল্পী দিৱস। এই কথা সাংস্কৃতিক পৰিক্ৰমা বিভাগৰ সূত্ৰই জানিবলৈ দিছে। আজি চৰকাৰী উদ্যোগত অনুষ্ঠিত হ’ব লগীয়া এই শিল্পী দিৱসত মুখ্য মন্ত্ৰী সৰ্বানন্দ সোণোৱাল উপস্থিত থকাৰ লগতে, সাংস্কৃতিক পৰিক্ৰমা বিভাগৰ মন্ত্ৰী নৱ দলেও উপস্থিত থাকিব।
শিল্পী দিৱসত প্ৰতিবছৰৰ দৰে এইবছৰো সাংস্কৃতিক পৰিক্ৰমা বিভাগৰ জৰিয়তে চৰকাৰে ৰাজ্যৰ দুজন শিল্পীক চলিত বৰ্ষৰ শিল্পী বঁটা প্ৰদান কৰিব। বঁটা প্ৰাপক শিল্পী দুজন হ’ল কুল বৰুৱা আৰু অণিমা বৰঠাকুৰ। তেওঁলোক দুয়োজনকে বঁটা প্ৰদান কৰিব মুখ্য মন্ত্ৰী সৰ্বানন্দ সোণোৱালে।
উল্লেখযোগ্য যে চৰকাৰীভাৱে কেন্দ্ৰীয় শিল্পী দিৱসৰ উদযাপনৰ ব্যৱস্থা কৰিলেও চৰকাৰে ডিব্ৰুগড় জিলাৰ তামোলপুৰ চাহ বাগিচাত থকা জ্যোতিপ্ৰসাদৰ জন্মগৃহটো সংৰক্ষণৰ ব্যৱস্থা নকৰাত চৰকাৰৰ বিৰুদ্ধে সচেতন নাগৰিক তথা স্থানীয় ৰাইজে ক্ষোভ প্ৰকাশ কৰিছে। ১৯০৩ চনৰ ১৭ জুনত অসমীয়াৰ সাংস্কৃতিক ক্ষেত্ৰখনৰ এই মহীৰূহৰ জন্ম হোৱা ঘৰটো এতিয়া প্ৰায় জৰাজীৰ্ণ হৈ পৰিছে বুলি স্থানীয় ৰাইজে জানিবলৈ দিছে। ডিব্ৰুগড়ৰ সচেতন নাগৰিকে জনাইছে যে ঘৰটো সংৰক্ষণ নকৰিলে মহান শিল্পীজনৰ জন্ম তথা জীৱন সম্পৰ্কীয় বহুতো স্মৃতি তথা তথ্যই লোপ পাব। কেৱল শিল্পী বঁটা দি শিল্পীজনক জীয়াই ৰাখিব নোৱাৰি বুলিও মন্তব্য কৰে সচেতন ৰাইজে।
জ্যোতি চিত্ৰবনৰ সোণালী জয়ন্তী বৰ্ষ
১৯৬৮ চনতে মুকলি কৰা ৰাজ্যিক পৰ্য্যায়ৰ দেশৰ ভিতৰতে প্ৰথমটো চৰকাৰী ফিল্ম ষ্টুডিঅ’ জ্যোতি চিত্ৰবনে এইবাৰ সোণালী বৰ্ষত ভৰি দিছে। সেই উপলক্ষে আজিৰ পৰা জ্যোতি চিত্ৰবনে সোণালী জয়ন্তী বৰ্ষ উদযাপন আৰম্ভ কৰিব বুলি সাংস্কৃতিক পৰিক্ৰমা বিভাগে জানিবলৈ দিছে। ইয়াৰ বাবে জ্যোতি চিত্ৰবনৰ সমগ্ৰ চৌহদ নতুনকৈ সজাই তোলা হৈছে বুলিও জানিবলৈ দিয়ে।
দিব্যাংগসকলক লৈ ‘সঁহাৰি’ৰ কাৰ্য্যসূচী
আনহাতে এই শিল্পী দিৱসতে জ্যোতি চিত্ৰবনত ‘সঁহাৰি’ নামৰ স্বেচ্ছাসেৱী সংগঠনটোৱে জ্যোতি চিত্ৰবনৰ সহযোগত চিত্ৰবনৰ চৌহদতে দিব্যাংগসকলক লৈ শিল্পী দিৱস উদযাপন কৰিব।
সদৌ অসম ছাত্ৰ সন্থাৰ কেন্দ্ৰীয় শিল্পী দিৱস
সদৌ অসম ছাত্ৰ সন্থাৰ তৰফৰ পৰা এন ই নাওক জনাইছে যে ছাত্ৰ সংগঠনটোৱেও বিশ্বনাথ জিলাৰ সদৰ বিশ্বনাথ চাৰি আলিত আজি কেন্দ্ৰীয়ভাৱে শিল্পী দিৱসৰ আয়োজন কৰিছে।
