মণিপুৰৰ সীমান্তত অৱস্থিত চান্দেল জিলাৰ ৫খন গাঁওৰ কৃষকসকলৰ মাজত ২৯ আছাম ৰাইফলছে আফিং খেতিৰ বিকল্প হিচাপে নেমুঘাঁহৰ সঁচ বিতৰণ কৰে। আছাম ৰাইফলছৰ (দক্ষিণ) জন-সম্পৰ্কৰক্ষী বিষয়াগৰাকীৰ মতে এই পাঁচখন গাঁও হৈছে জৌপি, ছাইবল জৌপি, টোলবাং, হেনচাম আৰু টি বোলেন।
আছাম ৰাইফলছৰ ২৮ ছেক্টৰৰ ব্ৰিগেডিয়াৰ নীলেশ ভনোটৰ উপস্থিতিত প্ৰায় ২ লাখ নেমুঘাঁহৰ পুলি বিতৰণ কৰা হয়।
আছাম ৰাইফলছৰ (দক্ষিণ) জন-সম্পৰ্কৰক্ষী বিষয়াগৰাকীয়ে সংবাদ টোকা যোগে জনাইছে যে এই ঠাইখিনি অত্যন্ত পিছপৰা আৰু পাহাৰীয়া এলেকা হোৱাৰ বাবে বাৰিষাৰ কালচোৱাত দীৰ্ঘ সময়ৰ বাবে বতৰ বেয়া হৈ থাকে। সেয়েহে ইয়াৰ বাসিন্দাসকলে আফিঙৰ খেতিৰ ওপৰতে নিৰ্ভৰ কৰিবলগীয়া হয়।
উল্লেখ্য যে মে’ মাহৰ ২৬ তাৰিখে ম্যানমাৰৰ সীমান্তৱৰ্তী টেংনৌপল জিলাৰ অন্তৰ্গত ৩১খন গাঁওৰ কৃষকসকলৰ মাজত আছাম ৰাইফলছে ফল আৰু আংকাৰিক উদ্ভিদৰ ১,১০,০০০ টা পুলি বিতৰণ কৰিছিল।
যোৱা মাহত মণিপুৰৰ মুখ্য মন্ত্ৰী এন বীৰেন সিঙে চৰকাৰৰ দ্বাৰা ঘোষিত ‘নিচাযুক্ত দ্ৰব্য বিৰোধী অভিযান’ত সমৰ্থন জনোৱা বাবে আছাম ৰাইফলছৰ প্ৰশংসা কৰিছিল। এই অভিযানৰ অংশ হিচাপে আনকি চৰকাৰী সংস্থাসমূহে ৰাজ্যখনৰ আফিঙৰ খেতি ধ্বংস কৰিবলৈও আৰম্ভ কৰিছিল।
উল্লেখ্য যে জৌপি আৰু ডিংপি এলেকাৰ গাঁওবাসীসকলে আফিঙৰ পৰিৱৰ্তে নেমুঘাঁহৰ খেতি কৰিবলৈ সন্মত হোৱাৰ পাছত জৌপি এলেকাত মোতায়েন হৈ থকা ২৯ আছাম ৰাইফলছৰ কৰ্নেল সচীন জৈনৰ তত্বাৱধানত প্ৰায় ৩০০ একৰ এলেকাত আফিঙৰ খেতি ধ্বংস কৰা হৈছিল।
বিষয়াগৰাকীয়ে জনাইছে যে আফিং খেতি কৰা ৩০০ একৰ ভূমিৰ ২৫০ একৰ কৃষিভূমিত তেওঁলোকে নেমুঘাঁহৰ খেতি কৰাৰ লক্ষ্য স্থিৰ কৰিছে।
