এছিয়াত এইডছ সম্পৰ্কীয় মৃত্যুৰ ঘটনা হ্ৰাস পোৱাৰ পিছতো অঞ্চলটোত এই ৰোগত মৃত্যু হোৱাৰ ঘটনা অব্যাহত আছে। ৰাষ্ট্ৰসংঘৰ এইডছ সম্পৰ্কীয় প্ৰতিবেদনত এছিয়াৰ দেশসমূহৰ ভিতৰত এইচ আই ভিত মৃত্যুবৰণ কৰা ৰোগীৰ তালিকাত ম্যানমাৰ পঞ্চম, নেপাল নৱম আৰু বাংলাদেশ দশম স্থানত আছে। ৬২,০০০ লোকৰ মৃত্যুৰে তালিকাৰ শীৰ্ষত আছে ভাৰত।
প্ৰতিবেদন অনুসৰি ২০১৬ ত এইডছত আক্ৰান্ত হৈ মৃত্যুবৰণ কৰা লোকৰ সংখ্যা ম্যানমাৰত ৭,৮০০ গৰাকী, নেপালত ১,৭০০ গৰাকী আৰু বাংলাদেশত প্ৰায় ১,০০০গৰাকী।
২০১৬ চনত হিচাপ অনুসৰি এছিয়াৰ দেশসমূহত ১৭০,০০০ এইডছ সম্পৰ্কীয় মৃত্যুৰ ঘটনা ঘটিছে। ২০১০ চনত এই সংখ্যা আছিল ২৪০,০০০ টা।
২০১৭ চনৰ ৰাষ্ট্ৰসংঘৰ প্ৰতিবেদন অনুসৰি এছিয়াৰ এই দেশসমূহত প্ৰায় ৫.১ নিযুত লোক এইচ আই ভি আক্ৰান্ত। ইয়াৰে ২.৪ নিযুত লোকে চিকিৎসা সেৱা লাভ কৰিছে। এইক্ষেত্ৰত চীনৰ তথ্য সুলভ নহয়।
দক্ষিণ আফ্ৰিকা আৰু নাইজেৰিয়াৰ পিছতে এই আই ভি আক্ৰান্ত লোকৰ ক্ষেত্ৰত তৃতীয় স্থানত থকা দেশখন হৈছে ভাৰত।
চীনত এইচ আই ভি আক্ৰান্ত লোকৰ সংখ্যা হিচাপ অনুসৰি ৪৩০,০০০ আৰু ১.৫ নিযুতৰ মাজত হ’ব বুলি কোৱা হৈছে। অৱশ্যে প্ৰতিবেদনত এইডছ সম্পৰ্কীয় ৰোগত মৃত্যু হোৱা লোকৰ তথ্য সুলভ নহয়।
২০১৬ চনত এই ৰোগত ভাৰতত ৩৮,০০০ লোকে প্ৰাণ হেৰুৱাইছিল। নতুনকৈ এইচ আই ভি আক্ৰান্তৰ সংখ্যা দেশখনত হ্ৰাস পাইছে যদিও এইডছ সম্পৰ্কীয় মৃত্যুৰ সংখ্যা বৃদ্ধি পাইছে।
এইডছ সম্পৰ্কীয় মৃত্যুৰ ক্ষেত্ৰত এছিয়াৰ ভিতৰত তৃতীয় স্থানত আছে থাইলেণ্ড। ২০১৬ চনত ১৬,০০০ লোক এই ৰোগত মৃত্যু হোৱা দেশখনে ২০২৩ চনৰ ভিতৰত এইডছৰ ভয়াবহতা নিৰ্মূল কৰিবলৈ ২০১৭ ত ৰাজহুৱা স্বাস্থ্য সেৱাৰ এক নতুন নীতি মুকলি কৰিছে।
এই ৰোগত ২০১৬ চনত ৮,০০০ লোকৰ মৃত্যু হোৱা ভিয়েটনাম এছিয়াৰ ভিতৰত চতুৰ্থ স্থানত আছে। দেশখনত নতুনকৈ আক্ৰান্ত লোকৰ লগতে এই ৰোগত মৃত্যু হোৱা লোকৰ সংখ্যা হ্ৰাস পোৱা পৰিলক্ষিত হৈছে।
এই ৰোগত মৃত্যু হোৱা তথা নতুনকৈ আক্ৰান্ত হোৱা লোকৰ সংখ্যা বাংলাদেশত সামান্য বৃদ্ধি পাইছে। অৱশ্যে সামগ্ৰিকভাৱে এইচ আই ভি প্ৰসাৰৰ ক্ষেত্ৰত বাংলাদেশৰ হাৰ তলতেই আছে।
প্ৰতিবেদনৰ মতে এছিয়াৰ এই অঞ্চলসমূহত এইডছ সম্পৰ্কীয় মৃত্যুৰ হাৰ ৩৯ শতাংশ হ্ৰাস পাইছে।
